Կոմիտասի թանգարան-ինստիտուտն ունկնդիրներին կներկայացնի հայ կոմպոզիտորների քիչ հնչող գործեր

Կոմիտասի թանգարան-ինստիտուտն այս տարի ունկնդիրներին կներկայացնի հայ կոմպոզիտորների քիչ կատարվող գործեր:

Այս մասին հունվարի 29-ին Կոմիտասի թանգարան-ինստիտուտում լրագրողների հետ զրույցում նշեց մշակութային հաստատության փոխտնօրեն Սարինա Ավթանդիլյանը:

«2016 թվականին մենք կներկայացնենք հայ կոմպոզիտորների այն ստեղծագործությունները, որոնք կամ մոռացված են, կամ սակավ են հնչում, կամ էլ երբևիցե չեն կատարվել: Կներկայացվեն Արտեմի Այվազյանի, Անուշավան Տեր-Ղևոնդյանի, Սարգիս Բարխուդարյանի, Էդգար Հովհաննիսյանի ստեղծագործությունները: Հիանալի ստեղծագործություններ են, ֆանտաստիկ գործեր կան»,-«Արմենպրես»-ի փոխանցմամբ` նշեց Սարինե Ավթանդիլյանը:

Նա հույս հայտնեց, որ թանգարանի ունկնդիրը կսիրի ներկայացվելիք ստեղծագործությունները:

«Պետք է ասեմ, որ բոլոր երաժիշտները մեծ սիրով են հանդես գալիս այս հիանալի տաճարում` Կոմիտասի թանգարան-ինստիտում, և իրենց տուրքն են մատուցում Կոմիտասին»,-շեշտեց Սարինա Ավթանդիլյանը:

2013թ.  մայիսի  30-ին  Հայաստանի Հանրապետության Նախագահ Սերժ Սարգսյանի առաջարկով  «Հայաստան» համահայկական հիմնադրամի  հոգաբարձուների խորհուրդն իր   նիստում որոշում ընդունեց Կոմիտասի թանգարան -ինստիտուտ  ստեղծելու  մասին:  Այդ որոշմամբ անհատույց օգտագործման իրավունքով ՀՀ մշակույթի  նախարարությանը տրամադրվեց Կոմիտասի անվան զբոսայգում գտնվող նախկին մշակույթի  պալատը,  որի հիման վրա կառուցվեց թանգարան-ինստիտուտի նոր շենքը: Ֆինանսական ծախսերը հոգացին «Փյունիկ» մարդկային ռեսուրսների զարգացման  համահայկական և «Լույս»  հիմնադրամները: Թանգարանի նախագծի հեղինակն ու ճարտարապետն է Արթուր Մեսչյանը: Թանգարանն ունի 8 սրահ մշտական ցուցադրությամբ, որի հեղինակ եւ համադրողը Վարդան Կարապետյանն է, ձեւավորող–նկարիչը՝ Ալբերտո Տորսելոն: Ծրագիրն իրականացրել է «Թանգարանների միջազգային խորհրդի (ԻԿՕՄ) Հայաստանի ազգային կոմիտեն: Կառույցն իր դռները պաշտոնապես բացեց 2015-ի հունվարի 29-ին: