Ինչու են բանակում զինվորները մահանում

Հայկական բանակում զինվորի մահը սովորական բան է դարձել: Կարծես, քիչ էին հակառակորդի կրակոցից, ինչու չէ նաև հենց զինծառայակցի կրակոցներից զոհերը, հիմա էլ պարբերաբար լսում ենք, թե այսինչ զինծառայողը անհասկանալի հանգամանքներում` առողջական խնդիրներ է ունեցել եւ մահացել: Սա այն դեպքում, երբ թե ժամկետային, թե պայմանագրային զինծառայողները, զինվորական ծառայության անցնելուց առաջ պարտադիր բժշկական զննության են ենթարկվում։ Եւ եթե պարզվում է՝ առողջական խնդիրներ ունեն, ազատվում են զինծառայությունից, կամ՝ նրանց հետ պայմանագրեր չեն կնքվում։ Բանակում պետք է լինեն բացարձակապես առողջ, զինվորական ծառայության համար պիտանի մարդիկ: Իսկ պայմանագրային զինծառայողների դեպքում, ենթադրվում է, որ նրանք ինչ-որ պարբերականությամբ՝ զինծառայության ընթացքում էլ պետք է անցնեն բժշկական զննություն։ Չէ որ կարող է հենց ծառայության ընթացքում ինչ-որ հիվանդություն զարգացած լինի եւ մարդը՝ աշխատանքի անցնելու ժամանակ առողջ լինի, իսկ հետագայում պարզվի, որ այլեւ պիտանի չէ զինվորական ծառայության համար։

Օգոստոսի 14-ին Պաշտպանության նախարարությունը հաղորդեց, որ կտրուկ վատթարացել է ՀՀ ՊՆ N զորամասի պայմանագրային զինծառայող, շարքային Մանվել Մյասնիկի Թադևոսյանի (ծնվ. 1981թ.) ինքնազգացողությունը: Չնայած անմիջապես ցուցաբերված բժշկական օգնությանը` զինծառայողի կյանքը փրկել չի հաջողվել, նա մահացել է: Նշանակվել է դատաբժշկական փորձաքննություն՝ մահվան պատճառը պարզելու համար:

Դրանից առաջ էլ կրկին առողջական խնդիրների պատճառով մեկ այլ զորամասում՝ եռամսյա հավաքի մի մասնակից էր մահացել: 
Թե ինչո՞ւ եւ ինչպե՞ս է պատահում, որ զինծառայողները բանակում մահանում են առողջական խնդիրների պատճառով, եթե համապատասխան բուժզննության են ենթարկվում, այս հարցի պատասխանը փորձեցինք ստանալ ՊՆ մամուլի խոսնակ Արամ Թորոսյանից:

Թորոսյանը մեր հարցին ի պատասխան նշեց, թե միանշանակ բոլոր զինծառայողներն անցնում են համապատասխան բուժզննություն, իսկ թե ինչու են անհասկանալի առողջական խնդիրների պատճառով մահանում, այդ հարցի պատասխանը պարզ կլինի միայն դատաբժշկական փորձաքննությունից հետո: Մենք հետաքրքրվեցինք, թե որքա՞ն կտևի դատաբժշկական փորձաքննությունը և վերջապես ո՞ր մարմինն է իրականացնում գործի քննությունը, Թորոսյանը նշեց, որ այդ հարցերին բանավոր պատասխանել չի կարող: