Կբարձրացվի քաղաքացիական ծառայության արդյունավետությունը

Քաղաքացիները ոչ միշտ են գոհ մնում քաղաքացիական ծառայողների մատուցած ծառայության որակից, ինչի պատճառ հիմնականում հանդիսանում է վերջինների մասնագիտական և մարդկային որոշակի հատկանիշների բացակայությունը: Այդ խնդրի լուծման ուղիներին է նվիրված «Քաղաքացիական ծառայության արդյունավետության բարձրացում. ընդհանուր գնահատման համակարգ և շարունակական կրթություն» ծրագրի ներդրումը:

Համանուն գիտաժողովի շրջանակում լրագրողներին տեղեկացրեց ՀՀ ՔԾԽ նախագահ Մանվել Բադալյանը:

«Այս գիտաժողովը նորույթ է մեզանում և ձևակերպում է մի քանի նոր խնդիրներ մեզ համար՝ քաղաքացիական ծառայողների ինքնագնահատման տեսքով: Այսինքն, մեր քաղաքացիական ծառայողներին պետք է տանենք այնպիսի ճանապարհով, որպեսզի մարդիկ կարողանան օբյեկտիվորեն գնահատել սեփական աշխատանքը, իսկ դա նշանակում է գնահատել մի շարք բաղադրիչներ, որոնցով պետք է պայմանավորված լինի նրանց աշխատանքի որակն ու արդյունավերտությունը: Իսկ դա նշանակում է՝ հասարակությանը մատուցած ծառայությունների որակը», - ասաց Մանվել Բադալյանը:
ՀՀ ՔԾԽ նախագահը հավելեց, որ ներկա պահին Հայաստանի Հանրապետության քաղաքացիական ծառայության համակարգում ընդգրկված են 46 մարմինների աշխատակազմեր, ավելի քան 7500 քաղծառայողներ: Իսկ Արևելյան գործընկերության շրջանակներում քաղաքացիական ծառայողների ընդհանուր գնահատման համակարգը և շարունակական կրթությունը նույնպես նորույթ են, սակայն Արևելյան գործընկերության առաջակներում Հայաստանը առաջամարտիկներից մեկն է:

Համաժողովն ուղղված է Արևելյան գործընկերության երկրներում քաղաքացիական ծառայության արդյունավետության բարձրացմանը, որի իրականացմանը կօգնի եվրոպական երկրների հանրային կառավարման ինստիտուտներում լայնորեն կիրառվող Ընդհանուր գնահատման համակարգի մեթոդաբանության տեղայնացումը և որակի կառավարման ժամանակակից մոդելների մեխանիզմների հետ ծանոթանալը:
Համաժողովին մասնակցում են Արևելյան գործընկերության 5 երկրի՝ Հայաստանի, Վրաստանի, Ուկրաինայի, Մոլդովայի, Բելառուսի, ինչպես նաև ԵՄ անդամ երկրների քաղաքացիական ծառայության համակարգող մարմինների պատվիրակներ:
«Քաղաքացիական ծառայության որակի բարձրացման համար գործում են բազմազան մեխանիզմներ, սակայն դրանց առաջնային մասում կանգնած է բուն մարդը: Մարդիկ պետք է լինեն մոտիվացված անդադար կատարելագործվելու և սովորելու», - ասաց Լեհաստանի Հանրապետության վարչապետի գրասենյակի ղեկավարի խորհրդատու Իզաբելա Նայդա-Յենդժեևսկան:

«Քաղաքացիական ծառայության արդյունավետության բարձրացում. ընդհանուր գնահատման համակարգ և շարունակական կրթություն» խորագրով միջազգային համաժողովը կազմակերպվել է ԵՄ Արևելյան գործընկերության Հանրային կառավարման բարեփոխումներ (ԱրԳ ՀԿԲ) պանելի ներքո՝ ՀՀ քաղաքացիական ծառայության խորհրդի և ԵՄ արտաքին գործերի եվրոպական ծառայության համագործակցությամբ: