Դաժան վրաերթ․ Բժիշկները պայքարում են վիրավորի կյանքի համար

Հուլիսի 14-ին, վրաերթ է տեղի ունեցել Արագածոտնի մարզում: Ժամը 11:40–ի սահմաններում «Աշտարակ» բժշկական կենտրոնից ոստիկանության Աշտարակի բաժին ահազանգ է ստացվել, որ անգիտակից վիճակում իրենց մոտ է տեղափոխվել մի քաղաքացի: Ինչպես հայտնում է ֆոտոլրագրող Գագիկ Շամշյանը, հիվանդանոց է մեկնել ոստիկանության Արագածոտնի մարզային վարչության պետ Տիգրան Կարապետյանը, ոստիկանության Աշտարակի բաժնի պետ Սերգեյ Մարտիրոսյանը: Ոստիկանները պարզել են, որ վիրավորը Արագածոտնի մարզի բնակիչ, 55-ամյա Գարիկ Կ.-ն է: Ահազանգով ժամանել է նաև Հայաստանի քննչական կոմիտեի Արագածոտնի մարզային քննչական վարչության խումբը՝ ավագ քննիչ Հովհաննիսյանի գլխավորությամբ:

Ոստիկաններն ու քննիչները, այնուհետև նրանց միացած ճանապարհային ոստիկանության 2-րդ սպայական գումարտակի Արագածոտնի մարզն սպասարկող սպայական վաշտի ծառայողները՝ ավագ տեսուչ Նորիկ Թադևոսյանի գլխավորությամբ, պարզել են, որ այսօր՝ ժամը 10:50–ի սահմաններում Լոռու մարզի բնակիչ, 56-ամյա Ռուդիկ Մ.-ն իր վարած Man մակնիշի բեռնատարով «Աշտարակ քարհանք» ԲԲԸ  Բյուրական հանքավայրում, հետընթաց կատարելիս, անզգուշաբար վրաերթի է ենթարկել Գարիկ Կ.-ին, ով ծայրահեղ ծանր ախտորոշմամբ տեղափոխվել է հիվանդանոց: Վրաերթի փաստով Արագածոտնի մարզային քննչական վարչությունում նախաձեռնվել է քրեական վարույթ: Գ. Շամշյանի տեղեկություններով՝ վիրավորը աշխատում է նշված հանքավայրում՝  որպես մեքենավար: