Հայաստանը վերածվում է մի մեծ միջանցքի՝ Պուտինը կասի, թե ով է ապահովելու «անվտանգությունը»

Lragir.am-ը գրում է. 

Նիկոլ Փաշինյանը զանգել է Պուտինին և քննարկել «քննարկել են Հայաստանի, Ռուսաստանի և Ադրբեջանի առաջնորդերի 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի եռակողմ հայտարարությունների կատարման ընթացքը»։

Ըստ Կրեմլի մամուլի ծառայության՝ «տեղի է ունեցել մտքերի փոխանակում հայ-ադրբեջանական սահմանին անվտանգության ապահովման և Հարավային Կովկասում տնտեսական, տրանսպորտային և նյութատեխնիկական կապերի վերականգնման հարցերի շուրջ։ Նիկոլ Փաշինյանը տեղեկացրել է Հայաստանի և Թուրքիայի միջև հարաբերությունների կարգավորմանն ուղղված վերջին շփումների մասին»։

Ելնելով ներկայացված կետերից՝ Փաշինյանը զանգահարել է Պուտինին՝ պարզելու, թե ինչպես է ապահովվելու անվտանգությունը հայ-ադրբեջանական և հայ-թուրքական սահմանին։ Հիշեցնենք, որ հունիսին Երևան ժամանած ՌԴ ԱԳ նախարար Սերգեյ Լավրովը հստակ ասել էր, որ Հայաստանի տարածքով ճանապարհներին ներդրվելու է «պարզեցված ռեժիմ»։ Նա դա միջանցք չի անվանել, բայց դրա էությունը հենց միջանցքն է։

Բացի այդ, Վիեննայում Հայաստանի եւ Թուրքիայի հատուկ ներկայացուցիչների վերջին հանդիպմանը պայմանավորվածություն է ձեռք բերվել բացել հայ-թուրքական սահմանը «երրորդ կողմերի համար»։

Այս տեղեկությունների համադրումը ցույց է տալիս, որ Հայաստանը «երրորդ կողմերի»՝ Ռուսաստանի եւ Բաքվի համար վերածվում է մեծ միջանցքի դեպի Թուրքիա։ Ընդ որում, խոսքը միայն Հայաստանի հարավի մասին չէ։ Բեռնափոխադրումները Հայաստանի տարածքով տեղի կունենան ազատ՝ առանց ստուգման իրավունքի։ Ընդ որում, միջանցքների երթուղիները որոշվելու են ռուս-թուրքական անհրաժեշտություններով։

Մնում է «անվտանգությունը»։ Հենց այս հարցերն է Փաշինյանը որոշել պարզել Պուտինի հետ, քանի որ Փաշինյանի կառավարությունը չի պատրաստվում ապահովել ՀՀ անվտանգությունը, նա սովոր է իր պարտավորությունները գցել ուրիշների վրա։