Հաղթանակի 70-ամյակի առթիվ ՄԱԿ-ի ամբիոնից հնչել են պատերազմական տարիների մեղեդիներ

ՄԱԿ-ում հնչել են պատերազմական տարիների մեղեդիները եւ անցած դարի՝ ժողովրդականություն վայելող կոմպոզիցիաները՝ ավարտելով Երկրորդ համաշխարհային պատերազմի ավարտման 70-ամյակի պատվին համաշխարհային կազմակերպության կենտրոնակայանում անցկացված միջոցառումների շարքը, տեղեկացնում է «Արմենպրես»-ը:

ՄԱԿ-ի Գլխավոր ասամբլեայի դահլիճում մայիսի 6-ի երեկոյան քաղաքական հայտարարություններն իրենց տեղը զիջել Էին «Կատյուշա», «Էյ, ուխնեմ», «Պոլյուշկո պոլե», «Տյոմնայա նոչ» երգերին եւ այլ կոմպոզիցիաների, որոնք լայն տարածում են գտել անցած հարյուրամյակում: Դրանք կատարել է Օլեգ Լունդստրեմի անվան նվագախումբը՝ Բորիս Ֆրուկմինի ղեկավարմամբ, նվագախումբ, որը ներառվել է Ռուսաստանի Գինեսի ռեկորդների գրքում՝ որպես աշխարհում հնագույն եւ անընդմեջ գոյություն ունեցող ջազային նվագախումբ:

Բացելով միջոցառումը՝ ՄԱԿ-ին առընթեր Ռուսաստանի մշտական ներկայացուցիչ Վիտալի Չուրկինն ընդգծել է, որ «երաժշտությունն առանձնակի կարեւորություն է ունեցել պատերազմի ժամանակ»: «Նույնիսկ պատերազմի ամենաահավոր պահերին երաժշտությունը խիզախություն եւ ուժ էր տալիս: Դմիտրի Շոստակովիչի Յոթերորդ սիմֆոնիան 1942 թվականի օգոստոսի 9-ին հնչեց բլոկադայի ենթարկված Լենինգրադում, երբ օկուպացված Եվրոպայում քչերը կարող էին հուսալ, որ այդ քաղաքը կանգուն կմնա»,- ասել է նա Գլխավոր ասամբլեայի դահլիճում:

Երեկոյի հյուրերի՝ ՄԱԿ-ի անդամ երկրների պատվիրակությունների ներկայացուցիչների, ինչպես նաեւ Երկրորդ աշխարհամարտի վետերանների առջեւ ելույթ է ունեցել նաեւ Աննա Բուտուռլինան եւ Ալեքսանդր Պանայոտովը, ինչպես նաեւ ամերիկացի ջազային երգչուհի Դեբորա Բրաունը, որը նվագախմբի հետ աշխատում է արդեն ավելի քան 25 տարի: Ծրագիրն ավարտվել է Դավիթ Թուխմանովի «Հաղթանակի օրը» երգով, որի կատարումը դահլիճը ողջունել է հոտնկայս:

Երեկոն եզրափակել է ՄԱԿ-ում կայացած միջոցառումների շարքը՝ նվիրված Հաղթանակի 70-ամյակին:

Մայիսի 5-ին ՄԱԿ-ի Նյու Յորքի կենտրոնակայանի տարածքում «խաղաղության եւ միասնության» ծառ են տնկել Հաղթանակի 70-ամյակի առթիվ: Հանդիսավոր արարողությանը մասնակցել են ՄԱԿ-ի գլխավոր քարտուղար Պան Գի Մունը, ինչպես նաեւ կազմակերպության անդամ 40-ից ավելի պետությունների ներկայացուցիչներ:

Հաղթանակի եւ առանց պատերազմների աշխարհի խորհրդանիշը դարձել է լացող սպիտակ բալենին, որը տնկել են ՄԱԿ-ի համալիրի կենտրոնական շենքի առջեւ: «Այսօր, տնկելով այս ծառը, մենք հիշում ենք բոլոր նրանց, ովքեր զոհվեցին եւ իրենց զոհաբերեցին հանուն այն առաքելության, որն ամրագրված է Միավորված ազգերի կազմակերպության Կանոնադրության մեջ»,- ասել է Պան Գի Մունը:

Արարողությունից հետո տեղի է ունեցել Գլխավոր ասամբլեայի գլխավոր նիստը՝ նվիրված Հաղթանակի օրվան, որն անցկացվել է Ռուսաստանի նախաձեռնությամբ, հաղորդել Է ՌԻԱ Նովոստին: