Շուշանիկ Բախշյանին «Շտապօգնության» մեքենայով տարան դատարանից (ֆոտո)

Երևանի «Շենգավիթ» բժշկական կենտրոնի բժշկուհի Շուշանիկ Բախշյանին քիչ առաջ «Շտապօգնության» մեքենայով տարան Կենտրոն եւ Նորք Մարաշ ընդհանուր իրավասության դատարանից:

NEWS.am-ի թղթակիցը հաղորդում է, որ «Շտապօգնությունը» դատարան էին կանչել մոտ 30 րոպե առաջ: Բախշյանի փաստաբանը՝ Ալեքսանդր Սիրունյանը, մեզ հետ զրույցում ասել էր, որ իր պաշտպանյալի ինքնազգացողությունը վատացել է:

«Մենք հիմա ոստիկանության շենքի մոտ ենք, սպասում ենք, որ քննիչն իջնի, համապատասխան թուղթը տա, որ կարողանանք Շուշանիկ Բախշյանին հիվանդանոց տեղափոխենք»– ասաց փաստաբանը։

Նշենք, որ դատարանը պարտավորեցրել է քննիչին ազատ արձակել Շուշանիկ Բախշյանին, սակայն ինչպես Ալեքսանդր Սիրունյանն է պնդում, քննիչը «փախել» է դատարանին, որ չկատարի դատավորի որոշումը:

Հիշեցնենք, որ Շուշանիկ Բախշյանին են հարազատները մեղադրում ծննդկանի եւ նորածնի մահվան մեջ:

Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: Մերիի վիճակը ծայրահեղ ծանր է եղել, հուլիսի 29-ին նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը:

Դեպքի առթիվ օգոստոսի 3-ին հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով: Ըստ Քննչական կոմիտեի տարածած հաղորդագրության՝ «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետեւանքով հղիության 35-րդ շաբաթում գտնվող Մերի Մարգարյանը մահացել է։