«Ադրբեջանը ներխուժել է Սյունիք, սակայն իշխանությունները չեն օգտվել ՀԱՊԿ դիմման գործիքից»

Hraparak.am-ը գրում է. 

Հերթական անգամ այս պահին ունենք միջազգային պատվիրակություն Հայաստանի Հանրապետությունում։ Ու մենք այստեղ ենք, քանի որ նախապես էինք հայտարարել, որ Հայաստանում առկա ճգնաժամը լսելի ենք դարձնելու ցանկացած նմանատիպ միջոցառման, հանդիպման կամ նիստի ժամանակ։  Այս մասին քիչ առաջ Բաղրամյան պողոտայում հայտարարեց Ազգային ժողովի «Հայաստան» խմբակցության պատգամավոր Արամ Վարդևանյանը։

Հիշեցնենք, որ նախագահական նստավայրում քիչ անց մեկնարկելու է ՀԱՊԿ ԱԳ նախարարների հանդիպում։ «Դիմադրություն» շարժումը որոշել էր երթ իրականացնել դեպի Բաղրամյան 26, սակայն ոստիկանությունը նախագահական չհասած պատ է կազմել։

«Սա է ձևը, որ բոլորը իմանան Հայաստանում իրականում ինչ վիճակ է։ Բոլորը պիտի իմանան, որ իշխանությունը, ավելի ճիշտ հեռացող իշխանությունը որևէ մանդատ չունի։ Տարուց ավել է՝ Ադրբեջանը ագրեսիայի արդյունքում ներխուժել է Սյունիք, հստակ հարց է առաջանում՝ լավ, ՀՀ իշխանությունները հիմա դիմե՞լ են ՀԱՊԿ, թե՞ ոչ։ ՀԱՊԿ-ի համապատասխան պայմանագիրը հստակ ձևակերպում է տալիս, որ 4-րդ հոդվածի համաձայն՝ ՀԱՊԿ անդամ երկրի նկատմամբ որևէ ձևով ագրեսիա, դա ագրեսիա է արդեն ՀԱՊԿ անդամ բոլոր երկների նկատմամբ։ Հիմա էլի հարց՝ ՀՀ իշխանությունները այս գործիքից օգտվել են, թե ոչ։ Պատասխանն այն է, որ ոչ , չեն օգտվել, իսկ ինչի համար չեն օգտվել, չեն օգտվել, քանի որ ապիկար են, որովհետև չեն կարողանում ու չեն ցանկանում պաշտպանել ՀՀ շահերը»,- հավելեց Վարդևանյանը։