Հայաստանը նույն տեմպերով շարունակում է գյուղմթերքի արտահանումը ՌԴ. ՍԱՊԾ

Հայաստանը նույն տեմպերով շարունակում է գյուղմթերքի արտահանումը Ռուսաստանի Դաշնություն: Այս մասին հունվարի 23-ին լրագրողների հետ հանդիպմանն ասաց ՀՀ գյուղատնտեսության նախարարության սննդամթերքի անվտանգության պետական ծառայության անասնաբուժության տեսչության պետ Հովհաննես Մկրտչյանը` անդրադառնալով ՌԴ-ի կողմից Հայաստանից գյուղմթերքի արտահանման ժամանակավոր արգելքին, որը կապված է դաբաղ հիվանդության հետ:«Հունվարի 20-ին 4, իսկ 21-ին` 5 մեքենա պանիր ենք արտահանել Ռուսաստան: Մենք ստացել ենք Ռուսաստանի գլխավոր անասնաբույժի գրությունը, թե որ ապրանքների արտահանումն է ժամանակավորապես արգելվում և ինչի համար: Այսպես, ՌԴ-ն ժամանակավորապես արգելել է կենդանի անասունների,  այդ կենդանիներից ստացված գենետկական նյութի, այն մսի և ենթամթերքի արտահանումը, որը չի անցել այնպիսի մշակում, որը կարող է բացառել վիրուսի առկայությունը: Այսինքն, այնպես չէ, որ ընդհանրապես մսի արտÕ �հանումն են արգելել: Արգելվել է նաև ջերմային մշակում չանցած կաթի և կաթնամթերքի, ինչպես նաև կենդանական ծագման հումքի արտահանումը: Սակայն մենք շարունակում ենք նույն տեմպերով իրականացնել արտահանումը ՌԴ, որովհետև իմ թվարկած ապրանքները, որոնց արտահանումը ժամանակավորապես արգելվել է, այնքան մեծ պահանջարկ չունի ՌԴ շուկայում»,- «Արմենպրես»-ի հաղորդմամբ` պարզաբանեց Մկրտչյանը:

Ռուսաստանի Դաշնության Գյուղատնտեսական վերահսկողական ծառայությունը` «Ռոսսելխոզնադզոր»-ը, 2016 թվականի հունվարի 20-ից ժամանակավորապես սահմանափակում է մտցրել Հայաստանից ՌԴ մի խումբ գյուղմթերքների, այդ թվում՝ մսի, կաթնամթերքի ներմուծման հարցում: Այդ մասին որոշումը տեղադրված է «Ռոսսելխոզնադզոր»-ի պաշտոնական կայքում: Որոշումը ռուսական կողմը պայմանավորել է Հայաստանում դաբաղ հիվանդության հետ կապված անկայուն իրավիճակով և դրա` Ռուսաստանի տարածք ներթափանցման բարձր ռիսկայնությամբ: 

Հովհաննես Մկրտչյանը հայտնեց, որ դեռ 2015թ. նոյեմբերին Թուրքիայում սկսել են գրանցվել դաբաղ հիվանդության դեպքեր:«Այդ մասին մենք տեղեկացել ենք Կենդանիների առողջության համաշխարհային կազմակերպության կայքէջից: Իրավիճակը վերլուծելու համար սպասեցինք Թուրքիայից հիվանդության հարուցիչի վերջնական լաբորատոր փորձաքննության արդյունքներին: Արդյունքում պարզվեց, որ գրանցված դաբաղ հիվանդության վիրուսը նոր տիպի է: Համենայնդեպս, այդ տեսակը նախկինում մեր տարածաշրջանում չի եղել: Այդ օրվանից սկսած` սննդի անվտանգության պետական ծառայությունը և գյուղատնտեսության նախարարությունը սկսել են համատեղ աշխատանքներ իրականացնել, որպեսզի հիվանդության ներթափանցումը Հայաստան բացառելու համար: Գրանցված դեպքերը ուղիղ գծով Հայաստանից 2.5-3 կմ հեռավորության վրա էին: Քանի որ հիվանդությունը շատ արագ տարածվող հիվանդություն է, չէր բացառվում, որ մեր հանրապետությունը զերծ կմնա այդ հիվանդությունից»,- մանրամասնեց նա:

Մկրտչյանը հավելեց, որ 2015թ. դեկտեմբերի 23-ին Արմավիրի մարզում նկատվել է դաբաղ հիվանդության նման կլինիկական նշաններով դեպք: «Մենք դրան արդեն իսկ պատրաստ էինք: Արագ իրականացվել են նմուշառման աշխատանքներ, ոչնչացվեց հիվանդ կենդանին, իսկ նմուշն ուղարկվեց լաբորատոր փորձաքննության: Դեկտեմբերի 27-ին ստացել ենք պատասխան, որը հաստատում էր, որ դա դաբաղ հիվանդություն է, սակայն, քանի որ կա գենետիկական փորձաքննություն, որը Հայաստանում չի իրականացվում և դրա իրավունքն ունեն միայն ռեֆերենս լաբորատորիաները, նմուծն արագ ուղարկվել է ՌԴ կենդանիներÕ « առողջության գիտահետազոտական ինստիտուտ, որպեսզի հաստատվի մեր մտահոգությունը, որ դա Թուրքիայում գրանցված դաբաղ հիվանդության նոր տեսակն է: Մենք ստացանք պատասխան հունվարի 14-ին, ինչի մասին կառավարության նիստի ժամանակ հայտարարել է գյուղատնտեսության նախարարը: Արագ միջոցառումներ իրականացվեցին` հիվանդության տարածումը Հայաստանում կանխելու համար»,- ընդգծեց Մկրտչյանը:

Նա հավելեց, որ հիվանդությունը կանխարգելելու ուղղությամբ սկսել են քայլեր ձեռնարկվել: Հայկական կողմը դիմել է ՌԴ այն բիոֆաբրիկային, որն արտադրում է համապատասխան պատվաստանյութ` հիվանդությունը կանխարգելելու համար: «Մենք խնդրել ենք, որ մեզ համար պահանջվող քանակը  հնարավորինս արագ պատրաստվի և տեղափոխվի Հայաստան, որպեսզի մենք կարողանանք տարածումը կանխարգելել: Հայտարարվել էր մրցույթ այդ պատվաստանյութը Հայաստան ներմուծելու համար,  մի կազմակերպություն շահել էր մրցույթը, սակայն այն չեղյալ հայտարարվեց` հաշվի առնելով դրա ռիսկայնÕ �ւթյունը: Արդեն իսկ հայտարարվել է նոր մրցույթ, որպեսզի ներմուծենք պատվաստանյութը»,- պարզաբանեց Հովհաննես Մկրտչյանը:

Հայաստանում դաբաղ հիվանդության երկրորդ դեպքն այս պահի դրությամբ չի գրանցվել: Հովհաննես Մկրտչյանը վստահեցրեց, որ այդ հիվանդությունը կարող են շատ արագ տեսնել անգամ ոչ մասնագետները: «Մենք աշխատում ենք նաև մեր ռուս գործընկերների հետ` այդ հիվանդության տարածումը կանխելու ուղղությամբ»,- ասաց նա: