Թույլ դրամը՝ տնտեսության փրկողա՞կ

Վերջին ժամանակներս որոշ իշխանամետ գործիչներ՝ պաշտոնյաներ, լրագրողներ, տնտեսագետներ և այլք, փորձելով գոնե ինչ-որ կերպ փրկել ներկայիս կառավարության դեմքը, փորձելով այս՝ սոցիալական ճահճում մխրճված և որևէ կերպ ելքի ուղի չգտնող երկրում նշմարել գոնե մի դրական բան, որպես Հայաստանի տնտեսական զարգացման ապացույց հաճախ սկսել են մատնանշել դրամի՝ իբր կայուն արժույթ լինելը՝ ի հակադրություն նույն ԵՏՄ երկրների արժույթների, որոնք, ինչպես գիտենք, հատկապես վերջին ժամանակներում սկսել են սրընթաց անկում ապրել:

Բանից պարզվում է, որ հայկական դրամի՝ որպես կայուն արժույթի փաստարկը՝ տնտեսական շահավետության տեսակետից, եթե ոչ ամբողջությամբ սին, ապա գոնե բավական վիճելի դրույթ է: Մասնավորապես՝ մի շարք հեղինակավոր տնտեսագետներ սկսել են հնչեցնել մի տեսակետ, համաձայն որի՝ ներկայումս ստեղծված պայմաններում պահել դրամը կայուն և ամեն կերպ խոչընդոտել դրամի արժեզրկմանը ոչ միայն սխալ է, այլև կարող է հղի լինել միանգամայն անկանխատեսելի հետևանքներով՝ երկարաժամկետ կտրվածքով: Ամբողջ խնդիրն այն է, որ կայուն դրամը փաստացի նվազեցնում է մեր արտահանման պոտենցիալը, ինչը ցանկացած երկրի տնտեսության զարգացման համար հիմնահենքային նշանակություն ունի: Չնայած մեծ է վտանգը, որ դրամի արժեզրկումը կարող է նաև բացասական հետևանքներ ունենալ (սոցիալական վտանգներ, ինֆլյացիոն ճնշումներ), սակայն, մասնագետների պնդմամբ, ներկայիս տնտեսական իրավիճակում այն կարող է նաև յուրօրինակ փրկողակի դեր խաղալ՝ դուրս բերելով տնտեսությունը ծանրագույն վիճակից. համեմատաբար ավելի թույլ դրամն առաջիկայում կարող է թե՛ տնտեսական զարգացում ապահովող միջոց դառնալ, թե՛ լուծել որոշ սոցիալական խնդիրներ:

Պետք չէ մոռանալ, որ մեր շատ ու շատ քաղաքացիներ, որոնք գտնվում են սոցիալական ցածր մակարդակի վրա, Հայաստանում սեփական գոյությունը պաշտպանում են բացառապես դրսից կատարվող դրամական փոխանցումների հաշվին, ինչը նշանակում է, որ 1 միավորի դիմաց, եթե արժեզրկվի դրամը, ֆիզիկական անձը հնարավորություն կստանա փաստացի շատ ավելի մեծ եկամուտ ունենալ, քան ունի այսօր:

Անկախ այն բանից, թե դուք անձամբ ինչպես եք վերաբերվում դրամի արժեզրկման գաղափարին, համաձայնե՛ք, որ եթե երկրում ներկայիս տնտեսական միտումները մոտ ապագայում փոփոխություններ չկրեն, ապա բնական, թե արհեստական ճանապարհով դրամի արժեզրկումը կանխելուն միտված մեր երկրի ֆինանսական քաղաքականությունը ոչ մի արդարացում չի կարող ունենալ, և կարիք է զգացվելու նոր մոտեցումների, որոնցից մեկը կարող է և դրամի արժեզրկումը լինել: