Ալիևը գոհ է Բրյուսելում Փաշինյանի հետ հանդիպումից․ Ինչ է պատմել նա Թուրքիայի նախագահ Էրդողանին
Քաղաքականություն
Ադրբեջանի նախագահ Իլհամ Ալիեւը մայիսի 23-ի ուշ երեկոյան զանգահարել է Թուրքիայի նախագահ Ռեջեփ Թայիփ Էրդողանին։ Այս մասին հայտնում են ադրբեջանական ԶԼՄ-ները՝ վկայակոչելով ԱՀ նախագահի մամուլի ծառայությունը:
«Իլհամ Ալիեւը Ռեջեփ Թայիփ Էրդողանին պատմել է նախօրեին Բրյուսելում Եվրոպական խորհրդի նախագահի եւ ՀՀ վարչապետի հետ կայացած բանակցությունների մասին։ Ալիեւն անդրադարձել է հանդիպման ընթացքում քննարկված հարցերին՝ կապված Ադրբեջանի եւ Հայաստանի միջեւ խաղաղության պայմանագրի նախապատրաստման հետ, որն այդ կապակցությամբ ներկայացվել է Ադրբեջանի կողմից միջազգային իրավունքի վրա հիմնված հինգ սկզբունքներով, երկու երկրների միջեւ հարաբերությունների կարգավորմամբ, տրանսպորտային միջանցքների բացմամբ, սահմանների սահմանազատմամբ: Ադրբեջանի նախագահը դրական է գնահատել Բրյուսելում կայացած եռակողմ հանդիպման արդյունքները։
Ալիեւը նշել է, որ այսօր կարգադրություն է ստորագրել Ադրբեջանի եւ Հայաստանի միջեւ պետական սահմանի սահմանազատման պետական հանձնաժողովի ստեղծման մասին։ Նա նաեւ նշել է, որ կողմերը պայմանավորվածություն են ձեռք բերել Զանգեզուրի միջանցքի բացման շուրջ, այդ թվում՝ ինչպես երկաթուղու, այնպես էլ մայրուղու կառուցման։ Թուրքիայի նախագահ Ռեջեփ Թայիփ Էրդողանն իր հերթին շնորհակալություն է հայտնել եռակողմ հանդիպման մասին տեղեկատվության համար եւ բարձր է գնահատել դրանում ձեռք բերված դրական արդյունքները։ Ադրբեջանի եւ Թուրքիայի նախագահներն ընդգծել են տարածաշրջանում շուտափույթ խաղաղության հասնելու կարեւորությունը։ Զրույցի ընթացքում պետությունների ղեկավարները մտքեր են փոխանակել նաեւ երկկողմ հարաբերությունների եւ հետագա շփումների շուրջ»,- ԶԼՄ-ները մեջբերում են տարածված հաղորդագրությունը:
1
2
3
4
5
1
2
3
4
5
