Ռուբլու արժեզրկումն իր ազդեցությունը կթողնի միգրացիոն հոսքերի վրա

Ռուսական ռուբլու արժեզրկումը չի կարող չանդրադառնալ միգրացիոն հոսքերի վրա: Այս մասին «Արմենպրես»-ի հետ զրույցում նշեց տնտեսագետ Գարիկ Սիրոյանը: Նրա խոսքով, միգրացիոն հոսքերի վրա ռուբլու արժեզկման ազդեցությունը մի քանի ձևով կարող է լինել: Նախ դեպի Ռուսաստան արտագնա աշխատանքի մեկնողների մի մասն այս անգ ամ չի մեկնի, կնախընտրի մնալ Հայաստանում: Պատճառն այն է, որ իրենց աշխատանքի դիմաց ստացված ռուբլին արժեզրկվել է, այն, փոխանակելով դրամի, բավական քիչ գումար է ստացվում: Այստեղ արդեն արտագնա աշխատանքի մեկնելու ոչ նպատակահարմարության հարց է առաջ գալիս:

Ամեն դեպքում, ըստ տնտեսագետի, այն, որ Հայաստանում աշխատատեղ չկա, մարդիկ, դա հաշվի առնելով, կարող են ստիպված գնալ, որովհետև ավելի լավ է չնչին գումար վաստակել, քան ոչինչ չունենալ: Գարիկ Սիրոյանի խոսքով, թեկուզ քիչ գումար վաստակելով, գոնե օրվա հացի խնդիր կկարողանան լուծել:

«Ռուբլու արժեզրկմամբ պայմանավորված, միգրացիոն հոսքերում կարող է այլ միտում ևս նկատվել: Մասնավորպես, արտագնա աշխատանքի մեկնողները գնան ընտանիքներով: Չէ որ արտագնա աշխատանքի մեկնածն իր վաստակած գումարից և’ այնտեղ է ծախսում, և’ այստեղ ուղարկում: Այստեղ ուղարկված գումարն էլ արժեզրկված է: Հետևաբար տարբերակներից մեկն է ընտանիքով մեկ տեղում հավաքվելը, որպեսզի վաստակած ռուբլին դրամի փոխանակելու անհրաժեշտություն չառաջանա ու հնարավոր լինի խուսափել ռուբլու արժեզրկմամբ պայմանավորված կորուստներից»,-ասաց տնտեսագետն՝ ավելացնելով, որ գարնան սկզբին պարզ կլինի, թե միգրացիոն հոսքերում ինչպիսի փոփոխություններ կգրանցվեն:

Եթե այնպես ստացվի, որ արտագնա աշխատանքի մեկնողների զգալի մասը մնա, ապա, ըստ տնտեսագետի, Հայաստանի աշխատանքի շուկան սթրես կապրի, որովհետև այն պատրաստ չէ այդքան աշխատողների: «Հայաստանի աշխատանքի շուկան հիմնականում Երևանում է կենտրոնացված: Մարզերի ոչ համաչափ զարգացման հետևանքով հիմնական շարժը կենտրոնացած է մայրաքաղաքում: Եվ եթե արտագնա աշխատողները, որոնք հիմնականում մարզերից են, մնան, ապա լուրջ խնդիրներ ի հայտ կգան՝ սոցիալական մի շարք հետևանքներով»,-ավելացրեց տնտեսագետը:

Նման պարագայում ի՞նչ պետք է անի կառավարությունը: Գարիկ Սիրոյանի խոսքով, ընդհանուր առմամբ, մեր պետության համար դժվարին ժամանակներ են: Համաշխարհային տնտեսությունն անկման փուլում է գտնվում ընդհանուր առմամբ, մասնավորպաես, զգալի դանդաղել է դրա խոշորագույն լոկոմոտիվներից մեկի՝ Չինաստանի տնտեսության աճը: Հայաստանը սերտորեն կապված է Ռուսաստանի տնտեսության հետ, իսկ վերջինս գտնվում է տնտեսական ծանր վիճակում: Բացի դրանից, ռուբլու արժեզրկմամբ պայմանավորված, կտրուկ նվազել է դեպի ՌԴ հայկական ապրանքների արտահանումը՝ գինի, կոնյակ, հյութեր, պ ահածոներ և այլն: Հետևաբար, տնտեսագետի խոսքով, դա ուղղակի ազդեցություն է թողնում Հայաստանի տնտեսական վիճակի վրա:

«Բացի դրանից, եթե մենք դիտարկում ենք Հայաստանը հանքանյութի արտահանման տեսանկյունից, ապա միջազգային շուկայում պղնձի, մոլիբդենի և մնացած հանքանյութերի գները նույնպես անկում են ապրել և այդ տեսնակյունից մեր արտարժութային մուտքերը և եկամուտները նույնպես նվազել են: Այս պայմաններում դժվար է որոշակի խնդիրներ լուծել, քանի որ գլոբալ առումով ծանր վիճակ է: Ամեն դեպքում, պետությունը պետք է միջամտի, փորձի խթանող քաղաքականություն իրականացնել աշխատատեղերի ստեղծման առումով, որպեսզի լարվածությունը մեղմվի: Մասնավորապես, խթանի փոքր և միջին բիզնե սի, գյուղացիական տնտեսությունների զարգացումը, որ մարդիկ լրացուցիչ եկամուտ ստանալու հնարավորություն ունենան և նոր աշխատատեղեր բացվեն»,-հավելեց Գարիկ Սիրոյանը: