Թուրքիան ծաղրո՞ւմ է Հայաստանին, թե՞ խափանում կարգավորումը

Թուրքիայի արտաքին գործերի նախարար Մևլյութ Չավուշօղլուն երեկ մեղադրանքներ է հղել Հայաստանի հասցեին, թե չեն ուզում բանակցությունները վարել Թուրքիայում կամ Հայաստանում, ապա տեղեկացրել է, որ Հայաստանի և Թուրքիայի հատուկ ներկայացուցիչների հաջորդ հանդիպումը կկայանա Վիեննայում։

«Հայաստանին ուզում եմ ասել՝ լավ, դուք կարող եք ճնշման տակ լինել, գործընթացը դժվար է, սփյուռքի մի մասը դեմ է կարգավորմանը, բայց երրորդ երկրում հանդիպելու կարիք դեռ կա՞։ Եթե հանդիպումները մեր երկրներում անելու հարցում համաձայնության չենք գալիս, մյուս հարցերում ինչպե՞ս ենք քայլ անելու»,- հայտարարել է թուրք պաշտոնյան։

Չավուշօղլուն նաև նշել է, որ Հայաստանի հետ հարաբերությունների հարցում հստակ քայլեր են լինելու, ու Հարավային Կովկասի կայունության համար բոլորը բոլորի հետ պետք է կարգավորեն իրենց հարաբերությունները. «Սրանք, իհարկե, մեկ օրում լինող բաներ չեն։ Մեր հատուկ ներկայացուցիչները նորից են հանդիպելու»,- ասել է նա:

Թուրքիայի արտգործնախարարի այս հայտարարությունները՝ ուղղված Հայաստանի գործող իշխանություններին, ոչ այլ ինչ են, քան ծաղր։ Ըստ էության, Թուրքիայի ԱԳՆ նախարարը, որը վերջին շրջանում փորձում էր բավականին հարգալից լինել Հայաստանի գործող իշխանությունների հանդեպ, սիրաշահել և ներքաշել թուրք-հայկական հարաբերությունների կարգավորման դաշտ իրենց ձեռնտու պայմաններով, թերևս այժմ լիովին փոխել է իր դիրքորոշումը և փորձում է ծաղրել ու հեգնել փաշինյանական իշխանությանը։ Չի բացառվում, որ այս կերպ նաև Թուրքիան փորձում է խափանել կարգավորման գործընթացը՝ Հայաստանի հետ ռազմական հնարավոր նոր սրման գնալու համար։

Դրանից հետո Թուրքիան կկարողանա հայտարարել, թե հենց Հայաստանն է խափանել կարգավորումը, իսկ փաշինյանական իշխանությունը մինչ այս պահը որևէ կերպ չի արձագանքել Մևլյութ Չավուշօղլուի հայտարարություններին, չի նշել, թե իրականում արդյո՞ք հանդիպելու են Ռուբեն Ռուբինյանն ու Սերդար Քըլըչը, թե՞ ոչ։ Եվ չի հստակեցրել, թե ինչու է Հայաստանը ցանկացել հանդիպումը կազմակերպել Վիեննայում։ Ցանկացած իրավիճակում դեռևս վաղուց էինք նշել, որ հարաբերությունների կարգավորման այս ֆորմատը լրջագույն սպառնալիքներ է ստեղծում Հայաստանի համար։ Ցանկացած իրավիճակում Թուրքիան շահած է դուրս գալու, անկախ նրանից կկարգավորի՞ հարաբերությունները, թե՞ ոչ։

Տիգրան Վիրաբյան