Սյունիքից տեղեկացնում են

ՀՀ քննչական կոմիտեի Սյունիքի մարզային քննչական վարչության Գորիսի քննչական բաժնում քննվող քրեական գործի շրջանակներում իրականացված քննչական և դատավարական այլ գործողությունների արդյունքում պարզվել են Գորիս քաղաքի 55-ամյա բնակչի սպանության մի շարք  հանգամանքներ, ենթադրյալ հանցագործությունը կատարած անձի ինքնությունը:

Ինչպես արդեն տեղեկացրել ենք,  2022թ. ապրիլի 10-ին՝ ժամը 23:20-ին, «Գորիսի բժշկական կենտրոն» ՓԲԸ  էր ընդունվել Գորիս քաղաքի՝ 1966թ.ծնված բնակիչը, մահացած վիճակում:

Քրեական գործի նախաքննության ընթացքում այսօր՝ ժամը 09:20-ին, Գորիսի քննչական բաժին է ներկայացել նույն քաղաքի 32-ամյա բնակիչը և տվել ինքնախոստովանական  ցուցմունք:

Նրան մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով: Վերջինս ձերբակալվել է:

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

ՀԳ. Ավելի վաղ մենք գրել էինք, որ այս պատմության հիմքում հնուց եկած ներընտանեկան խնդիր է ընկած։ Գորիսից մեզ պատմեցին, որ վեճի և սպանության պատճառը եղել է մի արտամուսնական կապ՝ երիտասարդը, որն ամուսնացած է, սիրային կապի մեջ է եղել սպանվածի աղջկա հետ։ 55-ամյա տղամարդը դեմ է եղել իր աղջկա և ամուսնացած տղամարդու սիրային կապին։ Նրանց միջեւ կոնֆլիկտ է ծագել, որն էլ ավարտվել է ողբերգությամբ։ Այսօր սոցցանցերում լուր տարածվեց, որ սպանություն կատարած անձը Գորիսի քաղաքապետ Առուշ Առուշանյանի ընկերական շրջապատից է։

Մեզ հայտնի դարձավ, որ սպանված տղամարդը նույնպես Առուշանյանի ընկերներից է։ Սպանությունը որևէ քաղաքական ենթատեքստ չի պարունակում։