Կառավարությունն իրականացնելու է տնտեսական աճի ապահովման բազմաոլորտ քաղաքականություն

Տնտեսական աճի ապահովման ներքին հնարավորությունների ընդլայնման նպատակով ՀՀ կառավարությունը 2016 թվականին նախատեսում է իրականացնել բազմաոլորտ ու համալիր նպատակային քաղաքականություն: Ինչպես փոխանցում է«Արմենպրես»-ը, այդ ուղղությամբ աշխատանքների իրականացումն ընդգրկված է կառավարության 2016 թվականի գերակա ծրագրերի թվում:

Մասնավորապես, նախատեսվում է արտահանման վրա հիմնված արդյունաբերական քաղաքականության ռազմավարությամբ նախատեսված ծրագրերի, «Տեղեկատվա­կան տեխնո­լո­գիա­­նե­­րի ոլորտի խթանման ծառայություններ» 2016 թվականի ծրագրի, ՓՄՁ պետական աջակցության 2016 թվականի ծրագրի իրականացում: Ընթացիկ տարում կմեկնարկի նաև համաշխարհային բանկի «Տեղական տնտեսության և ենթակառուցվածքների զարգացման» վարկային ծրագիրը:

Գերակա խնդրի լուծման արդյունքում ակնկալվում է ոչ միայն առանձին ոլորտների մասով նոր հնարավորությունների ստեղծման ու գործարար ակտիվության խթանման շոշափելի արդյունքներ ունենալ, այլև` կայուն հիմքեր ձևավորել հետագայում տնտեսական աճի դրական դինամիկա ունենալու տեսակետից:

«Հաշվի առնելով Հայաստանի տնտեսության զարգացման առկա սահմանափակումները` արտաքին շուկաներում ստեղծված իրավիճակը տևական դառնալու պարագայում կարող է լրջագույն մարտահրավեր լինել տնտեսական աճի սպասումների իրականացման հեռանկարների առումով: Նման իրողությունները պահանջում են տնտեսական աճի մոդելի վերաձևակերպում` արտահանմանն ուղղված արդյունաբերական զարգացման ու տնտեսության միջազգային մրցունակության բարձրացման նպատակադրումներին զուգահեռ` երկրի ներքին հնարավորությունների բացահայտման, մոբիլիզացման ու արդյունավետ իրացման համակարÕ £ կառուցելով: Այս տեսակետից արտադրողականության մակարդակի բարձրաց­ման, տեխնոլոգիական արդիականաց­ման, արտաքին շուկաներում տեղական արտադրանքի մրցունա­կության բարձրացման քաղաքականության համալիրում կարևորելով պետության դերը` ՀՀ կառավարությունը հանդես է գալիս որպես բարենպաստ միջավայրի երաշխավոր, ընդհանուր քաղաքականության պատասխա­նատու և գործընկեր` առաջարկելով շարունակաբար ընդլայնվող աջակցության գործիքակազմ»,- ասված է գերակա ծրագրի հիմնավորման մեջ:

Ըստ գործադիրի՝ արդյունաբերական զարգացման և տնտեսության արդիականացման առաջնային շարժիչներից են տեղե­կատվա­կան տեխնոլոգիաների ոլորտի զարգացումն ու դրա արդյունք­ների համատարած կիրառումը տնտեսության բոլոր ճյուղերում: ՏՀՏ հասանելիությունը և մատչելիությունը բարձրացնելու, մրցունակ ՏՏ ընկերություններ ու կարողություններ զարգաց­նելու պետական ծրագրերը կոչված են ապահովելու այդ սպասելիքը: Որպես տնտեսության առավել ճկուն և նորարարություններ յուրացնելու տեսակետից առավել ընկալունակ հատված, փոքր և միջին ձեռնարկությունների զարգացմ անն ուղղված նպատակային քաղաքականությունը համալրում է գերակա խնդրի լուծմանն առնչվող քայլերի փաթեթը:

Միաժամանակ, կառավարությունը նպատակ ունենալով համաշխարհային զբոսաշրջային շուկայում Հայաստանի մրցունակության բարձրացման և զբոսաշրջային այցելությունների դինամիկ աճ ապահովելու՝ երկրում զբոսաշրջության ոլորտի հետագա զարգացումն ապահովելու և որպես տնտեսության առանցքային ոլորտ կայացնելու նպատակով  կարևորվում են հետևողական ջանքերը ենթակառուցվածքների և տեղական տնտեսության զարգացման ուղղությամբ: