Զգուշացում Փաշինյանին Արցախից

Արցախի Ազգային ժողովը նախօրեին չափազանց կարևոր արտահերթ նիստ է գումարել, հայտարարությամբ դիմել Հայաստանի իշխանություններին, որպեսզի հանկարծ թույլ չտան Բրյուսելում կայանալիք Ալիևի հետ հանդիպմանը հակահայկական գործողություններ։ Երեկ էլ Արցախի Ազգային ժողովի նախագահ Արթուր Թովմասյանը, մեկնաբանելով արցախյան հիմնախնդրի առջև ծառացած խնդիրները, հայտարարել է, թե Բրյուսելում կայացած Փաշինյան-Ալիև հանդիպման ժամանակ չի կարծում, թե Արցախի կարգավիճակի հետ կապված որևէ փաստաթուղթ կստորագրվի։

- Արցախը չի կարող լինել Ադրբեջանի կազմում, դա անհնարին է, սա գիտակցում են և՛ Հայաստանի Հանրապետության մեր գործընկերները, և՛ միջազգային հանրությունը՝ ի դեմս ԵԱՀԿ Մինսկի խումբը ներկայացնող համանախագահ երկրների։ Մենք օգտագործում ենք միջխորհրդարանական և դիվանագիտական բոլոր հնարավորությունները և պարբերաբար տեղյակ ենք պահում այն լուծումների մասին, որոնք Արցախում տեղի են ունենում, իսկ դրանք ուղղակի և ամեն անգամ փաստում են այն հայտնի ճշմարտությունը, որ այս հիմնախնդիրն ունի մեկ լուծում և պետք է տեղի ունենա ազգերի ինքնորոշման միջազգային սկզբունքի հիման վրա,- ասել է Արթուր Թովմասյանը։

Բնականաբար կեղծ կլինի այն պնդումը, թե Արցախի իշխանությունները չեն հասկանում, թե ինչ վտանգների առջև են կանգնած։ Ընդհակառակը նրանք հրաշալի գիտակցում են, թե ո՞ւր կարող է տանել Հայաստանը իշխանությունների ապիկար և դավաճանական գործողությունները և փորձում են այսպիսի հայտարարություններով կանխել վտանգավոր զարգացումները։

- Հայաստանի Հանրապետությունը եղել է, կա և պիտի լինի մեր ժողովրդի անվտանգության թիվ մեկ երաշխավորը, մենք միասին պետք է մեր ուրույն տեղը գտնենք սրընթաց փոփոխվող աշխարհակարգում և այդ համատեքստում շատ կարևոր է Հայաստան-Արցախ-Սփյուռք եռակողմ միասնությունը,- նշել է Արթուր Թովմասյանը։

Ըստ էության, Արցախի իշխանությունները մնացել են միայն բացառապես Հայաստանի հանրության անվտանգության երաշխիքների հույսին, և այս հայտարարությունը, ոչ այլ ինչ է, քան ընդամենը հոգու ճիչ, որպեսզի Հայաստանն ու Սփյուռքը կարողանան տեր կանգնել Արցախին, այլապես փաշինյանական իշխանությունը ցանկանում է ամեն ինչ անել որպեսզի վնասի Արցախի շահերին։

Վահե Կիրակոսյան