Պաշտպանության նախարարությունը կրկին կոծկում է իրականությունը

Երեկ մի քանի ժամ տարբերությամբ Հայաստանի պաշտպանության նախարարությունը հաղորդեց երկու ժամկետային զինծառայողների մահվան մասին։ Դեպքերը տեղի են ունեցել ոչ մարտական պայմաններում՝ Կապանում և Մեղրիում։ 20-ամյա Ալբերտ Միրոյանի դին ծնոտի հատվածում հրազենային վիրավորումով հայտնաբերվել էր նախօրեին երեկոյան ժամը 9-ի սահմաններում, Կապանի մոտ գտնվող մարտական դիրքում։ Ժամեր անց նույն Պաշտպանության նախարարությունը հայտնեց, որ 19-ամյա ժամկետային զինծառայող Էդուարդ Ռուստամյանն է մահացել։ Նրա դին հայտնաբերվել է Մեղրիի զորամասում՝ հրազենային վիրավորումով։

Երկու դեպքում էլ հարուցվել է քրեական գործ, և Պաշտպանության նախարարության ու քննչական կոմիտեի հաղորդմամբ, միջոցներ են ձեռնարկվում հանգամանքները պարզելու համար: Նշենք, որ առաջին դեպքի մասին հայտնի էր դարձել դեռ երեկ գիշերն անց, երբ մի շարք լրատվամիջոցներ տեղեկություն էին տարածել, թե Ադրբեջանը հարձակման է անցնում։ Մինչև առավոտ Հայաստանի Պաշտպանության նախարարությունն այդպես էլ որևէ պարզաբանում չներկայացրեց և միայն առավոտյան շուտ հիշեցրեց իր գոյության մասին։ Ավելին, երեկ նույնիսկ Սուրեն Պապիկյանի գլխավորած գերատեսչությունը հաթաթա էր տալիս մարդկանց, մուննաթ գալիս, թե սոցիալական ցանցերով ու տարբեր լրատվամիջոցներով տարածվող տեղեկությունը, որ իբր Ադրբեջանի զինված ուժերի ստորաբաժանումները սադրանք են իրականացրել հայ-ադրբեջանական սահմանին, չի համապատասխանում իրականությանը։

«Եվս մեկ անգամ հորդորում ենք սահմանային իրադրության վերաբերյալ տեղեկություններ հրապարակային հրապարակելիս հիմնվել բացառապես պաշտոնական հաղորդագրությունների վրա»,- ֆեյսբուքյան իր էջում գրել էր պաշտպանության նախարարությունը։

Արցախյան 44-օրյա պատերազմից հետո, Պաշտպանության նախարարությունը թերևս միակ հիմնարկն է, որը վարկանիշի և հեղինակության բացառիկ գահավիժում ունեցավ։ 44 օր շարունակ ստելուց և խաբելուց հետո մինչ օրս Հայաստանի Հանրապետությունում չեք գտնի որևէ մարդու, որը կվստահի այդ կառույցին, ավելին չեն վստահում նույնիսկ «Քաղաքացիական պայմանագիր» կուսակցության ներկայացուցիչները։ Եվ արատավոր վարքը, որ ցուցաբերում է պաշտպանական գերատեսչությունը, այլևս դուրս է որևէ տրամաբանությունից։

Նույն բանը Պաշտպանության նախարարությունը կարող էր հայտնել շատ ավելի վաղ, հանգստացնելով կրքերը, նաև հարավ-արևելյան հատվածում գտնվող զորամասերի զինծառայողների ծնողներին, որոնք վստահաբար գիշերվա կեսին զանգահարում էին իրենց զավակներին՝ ճշտելու արդյո՞ք ամեն ինչ նորմալ է։ Օրեր առաջ էլ Սուրեն Պապիկյանը Ազգային ժողովի ամբիոնից հայտարարում էր բանակային նոր ռեֆորմի, իրենց կատարած կադրային փոփոխությունների վերաբերյալ, նշում, թե լուրջ աշխատանքներ են տարվում այդ ուղղությամբ։ Թե որքանո՞վ են լուրջ այդ աշխատանքները, պարզ դարձավ ընդամենը երեկ, երբ հերթական անգամ Պաշտպանության նախարարության անտեղյակության և պրոֆեսիոնալիզմի պակասի պատճառով ստիպված խուճապ տարածվեց մամուլում և հանրության շրջանում։ 

Դավիթ Պողոսյան