Ինչու է մահվան ելքով ճանապարհատրանսպորտային պատահարի ժամանակ կոշիկը թռչում ոտքից

Մահվան ելքով ճանապարհատրանսպորտային պատահարները, ցավոք, հազվադեպ չեն մեր կյանքում։ Նկատենք, որ այդպիսի վթարների ժամանակ կոշիկները հիմնականում դուրս են թռչում տուժածի ոտքից. զուգադիպությո՞ւն, ֆիզիկայի օրե՞նք, թե՞ միստիկա։

Անգամ բժիշկների եւ ոստիկանների շրջանում կա նույնիսկ չգրված կանոն. եթե կոշիկը (ները) ընկած է ճանապարհի վրա, ապա մեծ է հավանականությունը, որ  վրաերթի ենթարկվածը մահացել է կամ շուտով կմահանա։ Հետաքրքիրն այն է, որ կոշիկը կարող է դուրս թռչել նաեւ այն դեպքում, երբ կիպ կապված է ոտքին։

Փորձագետները չեն կարողանում հստակ պատճառներ նշել։ Կան միայն ենթադրություններ. հարվածի հզոր ուժ,  դրանից հետո մկանների թուլացում, կենտրոնախույս ուժի ազդեցություն, հարվածի ժամանակ մարմնի կտրուկ արագացում, ինչի հետևանքով ներբանը  ասֆալտին քսվելով սահում է եւ կոշիկները ոտքից դուրս են թռչում:

Ուսումնասիրությունները ցույց են տվել, որ հաճախ թռչում է միայն այն ոտքի կոշիկը, որի վրա մարդն ավելի ակտիվորեն է հենվում քայլելիս: Շատ հաճախ վթարի ժամանակ հարվածից թռչում են նաեւ գլխարկները, թեւից ժամացույցները, գրպանների մանր-մունր պարունակությունը՝ հեռախոսներ, գրիչներ, դրամապանակներ։

Ի դեպ, վթարի վայր շտապող շտապօգնության բժիշկների համար տուժողի ոտքից դուրս եկած  կոշիկները մահացու վնասվածքների անուղղակի նշան են, այսինքն վկայում են բախման բարձր արագության մասին։ Հազվադեպ է պատահել, երբ նման դեպքերում հետիոտնը ողջ է մնացել։ Ֆորմալ առումով ոչ թե կոշիկներն են դուրս գալիս մարդու ոտքից, այլ` մարդն է բախման հետևանքով դուրս թռչում դրանցից` անցնելով որոշակի տարածություն։ Այսինքն՝ կոշիկները մնում են տեղում, իսկ տուժածը շարժվում է։ Եթե ​​մարմնի հաղթահարած տարածությունը գերազանցում է 15 մետրը, ապա մահվան հավանականությունը գրեթե 100% է:

Մյուս վարկածն այն է, որ հարվածի ժամանակ ոտքի մկանները թուլանում են եւ նպաստում կոշիկի դուրս թռչելուն։

Ամեն դեպքում, ամեն ինչ տարրական ֆիզիկայի օրենքների տիրույթում է` հարվածի ուժի, որը բավարար է կոշիկը հանելու եւ ,հետևաբար, մահացու վիրավորում հասցնելու համար:

Պատրաստեց Արամ Սիմոնյանը