Քստմնելի վարքագիծ. երբ թիրախավորվում են երեխաները

Քաղաքական պայքարում եւ, ընդհանրապես, կյանքում ամենացածր եւ քստմնելի վարքագիծը ընտանիք մտնելն է, երեխաներին իրենց անձնական խարդավանքների մեջ որևէ ենթատեքստով հոլովելը։

Հայաստանում էլ երբեմն զերծ չեն մնում այդ «գայթակղությունից»՝ դիմելով երեխաների միջոցով ծնողներին թիրախավորելու անբարո պրակտիկային։

Լեհաստանում նախկին դեսպան, ՍԴ աշխատակազմի նախկին ղեկավար Էդգար Ղազարյանի վերջին գրառումներից մեկն այս ճշմարտության ցցուն արտահայտությունն է։ Իսկ պատճառը Ազգային ժողովի նախագահ Ալեն Սիմոնյանի կնոջ հրապարակած մի տեսանյութն էր, որտեղ ԱԺ նախագահի փոքրիկ դուստրը մանկական չարաճճիությամբ թաքնվել է պետական դրոշի ետեւում։ «Մեր երկրի իրական վիճակի դեմքի արտահայտությամբ այս մարդն այսօր իր առաջին աշխատանքային օրը պետք է անցկացնի Ալեն Սիմոնյանի աղջկա խաղասենյակում` նստելով խաղալիքի վերածված պետական դրոշի առջև։ Ինքնասիրություն ունեցող յուրաքանչյուր ոք դա կաներ միայն Ալեն Սիմոնյանին պաշտոնից և հանրային կյանքի վռնդելու որոշման մասին իմանալուց հետո»,- գրել է Էդգար Ղազարյանը։

Նախկինում տարբեր տեղերից վռնդված, ապա կրկին ընդդիմության դրոշի տակ կանգնած, վերջերս էլ նախագահական ընտրություններին մասնակցելու սեփական ամբիցիաները չբավարարելու հետեւանքով իր դաշնակիցների վրա ցեխարձակումներ գործած մարդը, ցավոք, չի հասկանում, որ ցանկացած դրոշ ծածանվում է երեխաների ապագայի համար։ Նույնիսկ միջազգային արարողակարգերով արգելված չէ երեխաների ներկայությունը պետական դրոշի մոտ, չէ որ երեխաները պետության ապագայի սիմվոլն են, դրոշը՝ ներկայի։

Քաղաքական պայքարում հնարավոր են ամենավատ դրսեւորումները, միմյանց հասցեին ամենախիստ եւ կոշտ քննադատությունները, սակայն հակառակորդի ընտանիք մտնելը, երեխաներին այդ խաղերում ներքաշելը առնվազն անբարո պահվածք է: Որքան ցածր պետք է լինի մարդու բարոյական նկարագիրը, որ փորձի կպչել երեխայի եւ դրոշի անմեղ պատմությունից։

Եվ վերջում, դրոշի պաշտանմունքով այդքան աչքի ընկնող նախկին դեսպանը միգուցե սոցիալական ցանցի իր էջի ետնանկարը այլ դրոշի փոխարեն մեր՝ հայկական դրոշով փոխարիներ։

Արփինե Բարսեղյան