Ալիեւը սպասում է Նիկոլ Փաշինյանի մոսկովյան այցի արդյունքներին

Ինչպես հայտնի է, ապրիլին նախատեսվում է Նիկոլ Փաշինյանի պաշտոնական այցը Ռուսաստանի դաշնություն, որը կարող է վճռորոշ նշանակություն ունենալ մեզ համար: Բանն այն է, որ ադրբեջանական կողմը նախապայմաններ է առաջ քաշել եւ դրանք քննարկվել են Իլհամ Ալիեւ- Վլադիմիր Պուտին վերջին հանդիպման ժամանակ։ Ալիեւը խոստացել է, որ ռուս-ադրբեջանական ռազմավարական փաստաթղթի՝ հռչակագրի շարունակությունը կստորագրի միայն այն ժամանակ, երբ Հայաստանն էլ կստորագրի թուրք-ադրբեջանական տանդեմի համար բաղձալի խաղաղության պայմանագիրը: 

Հիշեցնենք, որ ռուս-ուկրաինական հակամարտությունից մեկ օր առաջ Ալիեւի այցը ՌԴ ավարտվեց դաշնակցային փոխգործակցության հռչակագրի ստորագրությամբ: Որոշ տեղեկություններով՝ Փաշինյանը նախնական համաձայնություն է տվել, որ կստորագրի փաստաթուղթը, որով ըստ էության նախատեսվում է ճանապարհների ապաշրջափակում, փոխադարձ տարածքային ամբողջականության ճանաչում եւ այլն: 

Պատահական չէ, որ ՀՀ իշխանությունները երեկվանից, կարելի է ասել, հող են նախապատրաստում դրա համար: Արտաքին գերատեսչության խոսնակը երեկ արձագանքելով Ադրբեջանի արտաքին գործերի նախարար Ջեյհուն Բայրամովի հայտարարությանը, թե Ադրբեջանը բազմիցս Հայաստանին խաղաղության պայմանագիր կնքելու առաջարկություն է արել, մեկնաբանել է նաև, այսպես կոչված, «Զանգեզուրի միջանցքի» մասին Թուրքիայի արտաքին գործերի նախարար Մևլութ Չավուշօղլուի հայտարարությունը: Խոնակն ասել է, որ Ադրբեջանի հետ խաղաղության պայմանագիր ստորագրելը կառավարության օրակարգային առաջնահերթություններից է, ինչ վերաբերում է միջանցքին.

«Մեզ համար դա անհասկանալի խոսույթ է, և սրա մասին գիտեն բոլորը: Մյուս կողմից՝ տարածաշրջանային կոմունիկացիաների բացումը նույնպես Կառավարության առաջնահերթություններից է, և այս ուղղությամբ կոնկրետ քայլեր են ձեռնարկվում, այդ թվում՝ «Հայկական խաչմերուկ» նախագծի շրջանակներում»: 

Հիշեցնենք, որ «Հայկական խաչմերուկ» տերմինն առաջինը շրջանառության մեջ դրեց Նիկոլ Փաշինյանը՝ փետրվարի վերջին՝ կառավարության նիստում փորձելով հերքել միջանցքի մասին լուրերը եւ դա ներկայացնելով այլ փաթեթավորմամբ․ «Այդ ճանապարհի ճյուղերից մեկը, նկատի ունեմ՝ Հյուսիս-hարավ, արևելք-արևմուտք, կամ եթե կարճ ասենք՝ Հայկական խաչմերուկի ճյուղերից մեկը, կկապի հյուսիսը հարավին, այսինքն, ըստ էության, Հայաստանի Հանրապետությունից դեպի Իրանի Իսլամական Հանրապետություն, մյուս ճյուղը, ըստ էության, Ադրբեջան, Հայաստան և հետագայում՝ դեպի Նախիջևան, Թուրքիա», - ներկայացրեց Փաշինյանը։

Ավելին՝ այստեղ