Ուկրաինան խնդրանքով դիմել է Կարմիր Խաչի միջազգային կոմիտեին

Ուկրաինան Կարմիր Խաչի միջազգային կոմիտեին խնդրում է շտապ օգնություն ցուցաբերել մարդասիրական միջանցքների ստեղծմանը: Այս մասին տեղեկանում ենք Ուկրիանայի պաշտպանության նախարարությունից:

«Ռուսական զորքերի մշտական ​​գնդակոծությունների պատճառով Ուկրաինայի մի շարք քաղաքներ ու գյուղեր հայտնվել են հումանիտար աղետի եզրին։ Հազարավոր մարդիկ տարհանման խիստ կարիք ունեն։։ Այս բնակավայրերը չունեն բավարար քանակությամբ սնունդ, ջուր, դեղորայք, լույս և կենտրոնացված ջրամատակարարում»,-ասվում է հաղորդագրության մեջ:

__________

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։

«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:

Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։

Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։