Հայ և թուրք բանագնացները հանդիպեցին․ մանրամասները գաղտնի են պահվում

Երեկ Ավստրիայի մայրաքաղաքում հանդիպել են հայ-թուրքական հարաբերությունների կարգավորման բանագնացները՝ Ռուբեն Ռուբինյանն ու Սերդար Քըլըչը։ Հանդիպումից հետո երկու երկրների ԱԳ նախարարությունները կրկին նույնաբովանդակ հայտարարություն տարածեցին՝ տեղեկացնելով, որ վերահաստատել են գործընթացը առանց նախապայմանների շարունակելու իրենց պատրաստակամությունը: Պաշտոնական հաղորդագրություններում շատ քիչ մանրամասներ կան, միայն նշվում է, որ հատուկ ներկայացուցիչները հանդիպման ընթացքում մտքեր են փոխանակել լիարժեք կարգավորմանը միտված համատեղ հնարավոր կոնկրետ քայլերի շուրջ։ Կողմերը, սակայն, չեն հստակեցնում, թե ինչ քայլերի մասին է խոսքը:

Հայ-թուրքական կարգավորումը, հատկապես արցախյան 44-օրյա պատերազմից և Հայաստանի համար ստեղծված աննպաստ իրադրության պայմաններում, չափազանց նուրբ թեմա է, և իզուր չէ, որ Նիկոլ Փաշինյանը հենց իր մերձավոր շրջապատի ներկայացուցիչ Ռուբինյանին է վստահել բանակցությունները։ Փաշինյանն ինքը բազմիցս նշել է, թե չի վստահում կադրային և հմուտ դիվանագետներին, որոնք իրենից ինչ-ինչ տեղեկություններ են թաքցնում։ Փոխարենը, այժմ ՀՀ իշխանություններն են թաքցնում տեղեկությունները հանրությունից, և կատարված իրողությունների մասին հայտնի է դառնում միայն պոստ-ֆակտում։ Թեպետ, հայկական կողմը շարունակում է պնդել, թե որևէ նախապայման չկա, Թուրքիայի նախագահի և պաշտոնական այլ շրջանակների հայտարարությունները փաստում են, որ Թուրքիան հստակ նախապայմաններ է դրել, իսկ գործող փաշինյանական վարչախումբը գլխիկոր դրանք ընդունում է ի գիտություն։

Թուրքիայի նախագահը Վիեննայի հանդիպումից առաջ հայտարարել էր՝ կարող են բացել սահմանները և վերականգնել դիվանագիտական հարաբերությունները՝ եթե Երևանը հավատարիմ մնա գործընթացը շարունակելու գաղափարին։ Ռեջեփ Թայիփ Էրդողանի խոսքով, Անկարան գոհ է, որ Հայաստանը հարաբերությունների կարգավորման համար կամք է ցուցաբերում, և ակնկալում են, որ հայկական կողմը կշարունակի իր դրական մոտեցումը: Պաշտոնական Երևանը նաև ընդգծել էր՝ այս հանդիպման արդյունքներից է կախված մարտի 11-13-ին Անթալիայում կայանալիք դիվանագիտական ֆորումին Հայաստանի մասնակցությունը։ Այս միջոցառմանը Թուրքիան հրավիրել է Հայաստանի ԱԳ նախարար Արարատ Միրզոյանին և բանակցություններում Հայաստանը ներկայացնող Ռուբեն Ռուբինյանին: Դեռևս հստակ որևէ տեղեկություն չկա՝ կմասնակցի՞ հայկական կողմը, թե՞ ոչ։

Լևոն Ղազարյան