Կլիչկո եղբայրները զենք կվերցնեն ու կկռվեն հանուն Ուկրաինայի. Reuters

Բռնցքամարտի ծանր քաշային կարգում նախկին չեմպիոն, Կիևի քաղաքապետ Վիտալի Կլիչկոն ասել է, որ եղբոր՝ բռնցքամարտիկ Վլադիմիր Կլիչկոյի հետ զենք կվերցնի՝ մասնակցելու «արյունալի պատերազմին»՝ Ռուսաստանի կողմից իրենց երկիր՝ Ուկրաինա ներխուժելուց հետո, գրում է Reuters-ը:

Վիտալի Կլիչկոն, որն Ուկրաինայի մայրաքաղաք Կիևի քաղաքապետն է 2014 թվականից, հայտարարել է, որ պատրաստ է կռվել։

«Ես այլ ելք չունեմ, ես պետք է դա անեմ: Ես կկռվեմ», - ասել է 50-ամյա տղամարդը ITV հեռուստաընկերության Good Morning Britain հաղորդմանը:

Վիտալի Կլիչկոն հավելել է, որ Կիևը վտանգի տակ է, և հիմնական առաջնահերթությունն է աշխատել ոստիկանության և ռազմական ուժերի հետ՝ աջակցելու կարևոր ենթակառուցվածքներին, ներառյալ էլեկտրաէներգիայի, գազի և ջրի մատակարարումը քաղաքացիների համար:

Նա հավելել է, որ քաղաքացիական անձինք պատրաստ են զինվորների պես պաշտպանել Կիևը: 

«Ես հավատում եմ Ուկրաինային, հավատում եմ իմ երկրին և հավատում եմ իմ ժողովրդին»,- ասել է Վիտալի Կլիչկոն։

Կիևի մերձակայքում գտնվող Գոստոմել քաղաքում շարունակվում են մարտերն ուկրաինացի և ռուս զինվորականների միջև։ Համապատասխան տեսանյութը հրապարակված է սոցցանցերում ուրբաթ՝ փետրվարի 25-ի առավոտյան։

Պայթյուններ են լսվում նաև Վորզելում և Կիևի մարզի Օբոլոն և Վինոգրադար շրջաններում:

Կիևում փետրվարի 25-ի առավոտյան օդային տագնապ է հայտարարվել, տեղեկացրել է Կիևի քաղաքային պետական վարչությունը։

Ավելի վաղ հաղորդվել էր, որ ուրբաթ տեղի ժամանակով առավոտյան 4:22-ի սահմանում Կիևում մի քանի պայթյուն է լսվել քաղաքի տարբեր հատվածներում։

Ըստ աղբյուրի՝ գիշերը քաղաքի երկնքում հակառակորդի թռչող սարք է խոցվել. դրա մասերը հարվածել են բնակելի շենքին։

Ուկրաինայի ներքին գործերի նախարարության տվյալներով՝ այսօր ռուսական զորքերը կփորձեն գրոհել Կիևը։

Ուկրաինայի ՆԳՆ ղեկավարի խորհրդական Անտոն Գերաշչենկոն հայտնել է, որ ռուսական զորքերը պատրաստվում են փետրվարի 25-ին հարձակվել Կիևի վրա:

«Ամենադժվար օրը կլինի այսօր: Թշնամու ծրագիրն է Իվանկովից և Չեռնիգովից տանկային շարասյուներով ճեղքել մինչև Կիև»,- գրել է նա՝ հավելելով, որ «ռուսական տանկերը հիանալի այրվում են», երբ խոցվում են «Ուկրաինայի դաշնակիցների նվերներով (նկատի ունի Արևմուտքից ստացած զինատեսակները-Tert.am)»:

Մինչդեռ Ուկրաինայի Զինված ուժերի Գլխավոր շտաբը հայտնում է, որ զինվորականները մարտեր են մղում Դիմեր և Իվանկով բնակավայրերի տարածքներում, որտեղ մեծ թվով հակառակորդի զրահամեքենաներ են կուտակվել։

Ըստ աղբյուրի՝ Ուկրաինայի ԶՈՒ-ն Իվանկովոյի մոտ Տետերով գետի շրջադարձին կանգնեցրել է հակառակորդի առաջխաղացումը, գետի վրայով անցնող կամուրջը ոչնչացվել է։ Հաղորդվում է նաև, որ հակառակորդը ավիահարված է հասցրել Կրոպիվնիցկի քաղաքի մոտ գտնվող ստորաբաժանումներին։

Նշվում է, որ Ուկրաինայի զինված ուժերի ռազմաօդային ուժերը պաշտպանում են Կիևի երկինքը:

Ինչպես ավելի վաղ հայտնել էր Tert.am-ը, Ուկրաինայի նախագահ Վլադիմիր Զելենսկին դիմել է ժողովրդին՝ հայտնելով, որ մեկ օրում զոհվել է 137 ուկրաինացի, ավելի քան 300 տուժած ունեն։

«Վերջին տվյալներով, փետրվարի 24-ին զոհվել է Ուկրաինայի 137 քաղաքացի, այդ թվում 10 սպա, 316 հոգի վիրավորում է ստացել»,- ասել է Զելենսկին:

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։