Վարչախումբը չի արձագանքում ադրբեջանական սադրանքին, բայց քրգործեր է հարուցում ցուցարարների դեմ
Երևանում կայացած «Եվրանեսթ» խորհրդարանական վեհաժողովի աշխատանքներին մասնակցող ադրբեջանցի Թաիր Միրկիշիլին և Սոլթան Մամադովը ադրբեջանցի չէին լինի, եթե մի սադրանք չիրականացնեին։ Նրանք հաջողացրել են այցելել Երևանում գտնվող իրանական «Կապույտ մզկիթ», ապա լուսանկար են տարածել սոցիալական ցանցերում։
«Մենք այցելեցինք Կապույտ մզկիթ։ Սա, որքան գիտենք, Ադրբեջանի միակ հուշարձանն է, որը պահպանվել է Երևանում։ Չնայած պատերին այլ պետության մասին գրություններին՝ մզկիթի պատերը, ճարտարապետությունը, ոգին մերն են։ Հուսով ենք, որ այս մզկիթում իրական տերերը շուտով կկարողանան կատարել իրենց աղոթքը։ Ի վերջո, ադրբեջանցիների աղոթքները միշտ բարի նպատակներով են, և դրանք լսվում են»,- գրել է Միրկիշիլին։
Ադրբեջանական այս սադրանքին Հայաստանի գործող իշխանությունները չեն արձագանքել, փոխարենը արձագանքել է Հայաստանում Իրանի դեսպանատունը։
«Մեծ բարեբախտություն է, որ այս պատմական արձանագրությունները պահպանվել են։ Ո՞վ կարող է կարդալ դրանք։ Կապույտ մզկիթն իրանական արվեստի խորհրդանիշ է»,– ասված է ՀՀ-ում Իրանի դեսպանատան գրառման մեջ։
Հայաստանի իշխանությունները նաև չեն պարզաբանել, թե ինչպես և ում ուղեկցությամբ են ադրբեջանցիները հայտնվել իրանական մզկիթում, ինչու է ԱԱԾ-ն կամ ոստիկանությունն ուղեկցել նրանց։ Փոխարենը, ՀՀ ոստիկանությունը խուլիգանության հոդվածով քրեական գործ է հարուցել ադրբեջանցի պատգամավորների այցի դեմ բողոքի ակցիա իրականացրած 25 քաղաքացիների նկատմամբ։ Վերջիններս մինչդեռ ահազանգում են, որ ոստիկաններն իրենց նկատմամբ բիրտ, անօրինական և անհամաչափ ուժ են կիրառել, ակցիայի ընթացքում նույնիսկ երիտասարդներից մեկի թևն է կոտրվել։ Ոստիկանական բռնությունները դատապարտել են նույնիսկ փաշինյանական վարչախմբին լոյալ իրավապաշտպանները, արձանագրել, որ իրավապահների գործողությունները խնդրահարույց են։ Ըստ էության, Հայաստանի գործող վարչախումբը «մուրճը» կարողանում է օգտագործել միայն երկրի ներսում, սեփական քաղաքացիների դեմ։ Թշնամու հետ հարաբերություններում փաշինյանական խառնամբոխն իրեն պահում է վախվորած և խեղճացած։
Սերոբ Դավթյան
1
2
3
4
5
1
2
3
4
5
1
2
3
5
