Ըստ փորձագետի`Հայաստանում բնակչության մոտ 60 տոկոսն է օգտվում ինտերնետից

Հայաստանում բնակչության մոտ 60 տոկոսն է օգտվում ինտերնետից։ «Արմենպրես»-ի մամուլի սրահում հրավիրված ասուլիսին այս մասին նշեց տեղեկատվական անվտանգության հարցերով փորձագետ Սամվել Մարտիրոսյանը: Նրա խոսքով` թե՛ ամբողջ աշխարհում, թե՛ Հայաստանում ինտերնետից չօգտվողների թիվն արագ կրճատվում է։

«Աշխարհի շատ երկրներում, այդ թվում Հայաստանում, տարբեր ծրագրեր են իրականացվում, որոնք ապագայում հնարավորություն կտան նվազեցնել ինտերնետից չօգտվողների թիվը։ Հայաստանում համացանցից օգտվողների թիվը հասել է 60 տոկոսի, բայց դա հաշվարկված է 14 և բարձր տարիքի մարդկանց շրջանում, եթե երեխաներին էլ գումարենք, ապա տոկոսը կաճի: Կարող ենք վստահաբար ասել, որ հաստատ նրանք ոչ պակաս ակտիվ են ինտերնետում»,-ասաց փորձագետը: Անդրադառնալով զարգացած երկրների ցուցանիշներին`  Սամվել Մարտիրոսյանը տեղեկացրեց, որ  այդ պետություններում համացանցից օգտվում է բնակչության 80 տոկոսից, որոշ երկրներում` անգամ 90 տոկոսից ավելին։

«Մեզ մոտ վերջին մի քանի տարիներին իրականում աճեց այդ ցուցանիշը, դեռ 2010 թվականին բնակչության 5 տոկոսն էր օգտվում, քանի որ ինտերնետ ծառայությունը չափազանց թանկ էր: Իհարկե,արձանագրում ենք, որ մեր երկրում ինտերնետից օգտվողների թիվն աճում է, բայց պետք է հասկանալ, թե նրանք հիմնականում ինչից են օգտվում: Եթե եվրոպական երկներում ինտերնետը գործիք է պետական գերատեսչությունների հետ շփման համար, ինտերնետի միջոցով վճարումներ են կատարում և այլ գործարքներ իրականացնում, ապա մեզ մոտ մեծ մասը սոցիալական ցանցերից է օգտվում»,-ավելացրեց Սամվել Մարտիրոսյանը։ Ըստ նրա` Էստոնիայում համացանցը  միակ միջոցն է հարկերն ու տուրքերը վճարելու համար: Ինտերնետը բնակչությանը համար որպես գործիք է։

«Հայաստանում, իհարկե, լավ է, որ ինտերնետը հասանելի է, բայց դա դեռևս կենսական պահանջ չէ, որովհետև առանց դրա էլ կարող ես մեր երկրում ապրել: Հայաստանում համացանցից այնպիսի մեծ բարիք չես ստանում, ինչպես եվրոպական երկրներում»,-ասաց փորձագետը։