ՀՀ առողջապահության նախարարությունում միջազգային գործընկերների հետ քննարկվել են համատեղ ծրագրերի իրականացման հնարավորությունները
Հասարակություն
Հայաստանի առողջապահական փորձն ուսումնասիրելու և համագործակցության ծրագրեր իրականացնելու նպատակով Հայաստան են ժամանել Հարվարդի առողջապահության դպրոցի «Դանա-ֆաբեր»-ի և Բոստոնի քաղցկեղի և արյան մանկական կենտրոնի գլոբալ ծրագրերի համակարգող Իրինի Ալբանտիի և նույն դպրոցի մագիստրոսների խումբը: Ինչպես «Արմենպրես»-ին տեղեկացրին ՀՀ առ ողջապահության նախարարության լրատվական ծառայությունից, նախարար Արմեն Մուրադյանի հետ հանդիպման ընթացքում քննարկվել են համատեղ ծրագրերի իրականացման հնարավարությունները:
ՀՀ առողջապահության նախարար Արմեն Մուրադյանը նշել է, որ Հայաստանում մեծ ուշադրություն է դարձվում ուռուցքաբանության ոլորտին: Նրա խոսքով` դրա վառ ապացույցներից է Ուռուցքաբանության գերազանցության կենտրոնի ստեղծման աշխատանքները, ինչպես նաև համագործակցությունը հասարակական կազմակերպությունների և հիմնադրամների հետ, ինչպիսին է օրինակ մանկական ուռուցքաբանության ոլորտում հսկայական աշխատանք իրականացնող «Նվիրիր կյանք» բարեգործական կազմակերպությունը:
«Վերջին տարիներին մանկական ուռուցքաբանությունը ոչ միայն առողջապահական, այլև սոցիալական և ժողովրդագրական խնդիրներ է ձևավորում»,- նշել է նախարարը: Նա հյուրերին ներկայացրել է նաև ՀՀ ԱՆ ՀՀ Ռ. Հ. Յոլյանի անվան արյունաբանական կենտրոնում իրականացվող շինարարական աշխատանքները, որտեղ նախատեսված է նաև ցողունային բջիջների և ոսկրածուծի փոխպատվաստման ծառայության ստեղծումը:
Արմեն Մուրադյանն անդրադարձել է նաև հանրային առողջության ոլորտում իրականացվող ծրագրերին, շարունակական մասնագիտական զարգացմանը: Նախարարը ներկայացրել է նաև հիվանդությունների կանխարգելմանը և վաղ փուլերում հայտնաբերմանն ուղղված 2015 թվականին մեկնարկած և այս տարի ևս շարունակվող նոր ծրագրերը, որոնց թվում են երեք ուղղություններով իրականացվող սկրինինգային, ինչպես նաև սոցիալական փաթեթի շահառուների համար կանխարգելիչ բժշկական զննության ծրագրերը:
Անդրադառնալով մասնագետների խմբի այցին` Արմեն Մուրադյանն հավաստիացրել է, որ ՀՀ նախարարությունը մշտապես պատրաստ է աջակցել փորձի փոխանակման և մասնագետների կարողությունների զարգացմանն ուղղված ծրագրերին հատկապես մանկական ուռուցքաբանության նման կարևոր ոլորտում:
Հարվարդի առողջապահության դպրոցի «Դանա-ֆաբեր»-ի և Բոստոնի քաղցկեղի և արյան մանկական կենտրոնի գլոբար ծրագրերի համակարգող Իրինի Ալբանտին նշել է, որ իրենք առաջին անգամ են Հայաստանում և արդեն ունեն «Մուրացան» համալսարանական հիվանդանոցի մասնագետների հետ համագործակցության որոշակի փորձ:
Այս բժշկական կազմակերպությունում իրենք արդեն իսկ սկսել են իրականացնել մասնագիտական խորհրդատվության, մանկական ուռուցքաբանության ոլորտում սոցիալ-հոգեբանական ծրագրերի ներդրման աշխատանքներ:
Ամերիկյան առաջատար բժշկական այս կազմակերպության ներկայացուցիչները պատրաստակամություն են հայտնել խորացնել համագործակցությունը և կյանքի կոչել արդյունավետ ծրագրեր մասնագետների վերապատրաստման, հեռաբժշկության և այլ ուղղություններով:
1
2
3
4
5
1
2
3
4
5
1
2
3
4
5
