Խաղողի մթերման հետ կապված խնդիրներն անդրադարձել են հարկատեսակների հավաքագրումների վրա

Արարատի մարզում 2015 թվականին խաղողի մթերման հետ կապված խնդիրներն անդրադարձել են նաեւ համայնքների կողմից իրականացվող պլան-կատարողականների վրա: Հիշյալ խնդրի հետեւանքով հողի հարկն այս տարվա հունվարի 1-ի դրությամբ մարզում հավաքագրվել է 97,5 տոկոսով` մուտքերը հասնելով  596 մլն 694 հազար դրամի: Սեփական եկամուտի մուտքերը պլան-կատրողականի համեմատ շեղում են ունեցել 1.4 տոկոսով` պետական բյուջե պակաս մուտքագրելով 34 մլն 681 հա զար դրամ: «Հավաքագրումներ կատարելիս մարզում թերացել եւ 100 տոկոսի սահմանագծին չեն հասել 97 համայնքներից շուրջ 15-ը: Դրանք այն համայնքների բնակիչներն են, որոնք ունեն խաղողի այգիներ եւ զբաղվում են խաղողագործությամբ. դա իրենց եկամտի հիմնական միջոցն է, որով էլ հոգում են իրենց ապրուստը»,-«Արմենպրես»-ի թղթակցի հետ զրույցում ընդգծեց Արարատի մարզպետարանի աշխատակազմի ֆինանսական եւ սոցիալ-տնտեսական զարգացմանվարչության պետ Գուրգեն Եղիազարյանը` հավելելով, որ այս տարի եղավ եւ չիրացված բերք, եւ 30-40 դրամով մթերում, ինչն էլ մարզում հանգեցրեց տարեվերջյան այս պատկերին: 

«10 տարվա ընթացքում սա առաջին դեպքն է, երբ սեփական եկամուտների կատարողականը չի ապահովվում: Արդեն իսկ քննարկում է եղել այդ համայնքների ղեկավարների հետ, բարձրաձայնվել են ետ մնալու պատճառները: Նրանք կլինեն ֆինանասական վարչության ուշադրության կենտրոնում, կիրականացվեն լրացուցիչ հավաքագրումներ` պակասը լրացնելու եւ 2016 թվականին եւս ետ չմնալու նպատակով»,- նշեց վարչության պետը:

Գույքահարկի եւ տեղական տուրքի մասով հավաքագրումները հատել են 100 տոկոսի սահմանագիծը` պլան-կատարողակնի համեմատ ավելի մուտքագրելով համապատասխանաբար 49 մլն 068 եւ 528 հազարական դրամ: Ամենից պակաս մուտքերն եղել են վարձակալության գծով. կատարողականը կազմել է 72,1 տոկոս: Մուտքեը պակաս են կատարվել 52 մլն 227 հազար դրամով: 

Ամփոփելով արդյունքները` Եղիազարյանն ընդգծեց նաեւ, թե յուրաքանչյուր բնակիչ եւ համայնքապետ պետք է գիտակցի, որ գումարների ժամանակին եւ ամբողջական հավաքագրումը բխում է համայնքի շահերից, որոնցով կատարվում է համայնքների քառամյա ծրագրերի իրականացումը:

Լիլիթ Մաճկալյան