Ինչպե՞ս ձախողել հերթական սահմանափակումը

Արդեն երկու օր է՝ Հայաստանում հանրային սննդի կետեր, հյուրանոցներ, մարզասրահներ, համերգասրահներ և մշակութային այլ վայրեր քաղաքացիների մուտքը միայն պատվաստման հավաստագրով կամ ՊՇՌ թեստի բացասական արդյունքով է թույլատրվում։ Կորոնավիրուսի վարակման թվերի աճին զուգահեռ գործող իշխանությունները սկսել են իբր ակտիվորեն սահմանափակումներ իրականացնել, սակայն հերթական անգամ ձախողելու են կորոնավիրուսի դեմ պայքարը, փոխարենը՝ լուրջ վնաս են հասցնելու տնտեսվարողներին։

Առաջին և լուրջ վնասը հասցվելու է ռեստորաններին և սրճարաններին, QR կոդ չունեցող քաղաքացիները կխուսափեն այդ հաստատություններ այցելելուց, իսկ ռեստորանների եկամուտները շեշտակի կնվազեն։ Սահմանափակումները ներդնելուց առաջ էլ գործարարները բողոքի ձայն էին բարձրացնում, սակայն նրանց բողոքները մնացին «ձայն բարբառո անապատի»։ Նվազելու են նաև այցելությունները մշակութային հաստատություններ։ Լուրջ դժգոհություններ են առաջացրել նաև կոդերի ստուգման ժամանակ մարդկանց անհատական տվյալների հանրայնացման դեպքերը։

Ըստ էության, առողջապահութան նախարարությունն ու ստուգող տեսչական մարմինները մատչելիություն են ունենում անհատական տվյալներին, մինչդեռ կարելի էր կարճ ժամանակում ճիշտ համակարգ ստեղծել, և առանց տվյալների արտահոսքի իրականացնել ստուգումները։ Խնդիր է նաև ստուգողների ռեսուրսների անբավարարությունը։ Տեսչական մարմինները, ոստիկանությունը, նախարարությունը ֆիզիկապես ի վիճակի չեն լինելու ամբողջ ծավալով ստուգումներ իրականացնել, բացի այդ՝ աշխատակիցները բավարար չափով հրահանգավորված չեն, կամ էլ, ինչն ավելի տարակուսելի է, ջանասիրաբար չեն իրականացնում իրենց պարտականությունները։ Արդյունքում, կեղծ կամ մեկ ուրիշի QR-կոդով առանց խնդրի կարող են ռեստորան էլ այցելել, համերգասրահներ էլ։

ԱԺ նախկին պատգամավոր Սոֆյա Հովսեփյանն, ի դեպ, արդեն իսկ այդպիսի մի դեպքի մասին է հայտնել։ Մարդիկ կեղծ թեսթերով կամ այլոց QR-կոդերի սքրիններով կարողացել են մուտք գործել համերգասրահներ, իսկ տեխնիկական միջոցներից առանձնապես գլուխ չհանող տարեց մարդիկ մնացել են դրսում։ Սոցիալական ցանցերում արդեն իսկ կարծիքներ են շրջանառվում, որ այս սահմանափակումները կորոնավիրուսի տարածման վրա զրոյական ազդեցություն են ունենալու։ Այս հանգամանքը, թերևս, բնավ չի մտահոգում փաշինյանական վարչախմբին։ ԱՀԿ-ին դուր գալու համար հերթապահ «պտիչկա» կդնեն, կանցնեն առաջ, իսկ արդեն այսօր կորոնավիրուսի վարակման 688 նոր դեպք է գրանցվել։

Արման Սահակյան