Մեզ միշտ համոզել են, որ մեր հաղորդումը վարկանիշ չունի, իրականում այդ ամենը սուտ էր. Լուսինե Բադալյան.

Հեռուստառադիո հաղորդավարներ Լուսինե Բադալյանն ու Ժակն այլևս հեռուստաէկրաններին չեն ներկայանում, բայց այս զույգի բացական, կարծես թե, նկատելի է:Life.panorama.am-ը փորձեց Լուսինե Բադալյանից ճշտել, թե արդյոք մոտ ժամանակներում ինքն ու Ժակը հեռուստատեսություն վերադառնալու ծրագրեր չունեն:

«Այս պահին այդ ուղղությամբ հստակ քայլեր դեռ չկան, բայց մտքեր, իհարկե, միշտ ունենք: Հիմա դեռևս քննարկումների փուլում են այն ծրագրերը, որոնց մասին մտածում ենք: Մենք ունենք տարիների ընթացքում մշակած ծրագրեր, որոնք ինչ-ինչ պատճառներով մեր հեռուստաընկերությունները ի վիճակի չեն եղել իրականացնելու: Ճիշտն ասած՝ էկրաններից հեռանալը նախապես պլանավորված չէր, դա շատ անսպասելի կատարվեց մեզ համար և մենք որոշեցինք տոներից հետո դուրս գալ այդ շոկային վիճակից և արդեն մտածել նոր անելիքների մասին»,- նշեց հաղորդավարուհին:

Հարցին՝ հեռուստադիտողը կրկին սպասի՞ Ժակ և Լուսինե Բադալյան զույգին, թե նրանց առանձին կտեսնի, Լուսինեն պատասխանեց. «Անկեղծ ասած կրկին հստակ ասել չեմ կարող: Իհարկե, ցանկալի է, որ ես և Ժակը միասին լինենք, որովհետև առանձնապես տրամադրված չենք առանձին գործելու և երբևէ չենք էլ պատկերացրել, որ մի օր իրարից անկախ կգործենք: Միաժամանակ, մենք չունենք նման ամբիցիա, որ պարտադիր միասին լինենք, երկուսս էլ թեկուզև առանձին մեր նպատակներն ունենք, բայց միևնույն է, ցանկալի է, որ մեր զույգին չբաժանեն, քանի որ մեր զույգը հայկական հեռուստադաշտի ամենաերկարատև համագործակցած զույգն է, մենք արդեն 18 տարի ենք միասին այս խոհանոցում, որից մեծ մասը դուետով ենք ներկայացել: Ուզում ենք շարունակենք պահպանել մեր դուետի ներդաշնակությունն ու օրինակելի հավատարմությունը»:

Ի դեպ, մեզ հետ զրույցում Լուսինեն անկեղծացավ՝ ասելով, որ եթերում չլինելու կարճ ժամանակահատվածում ահռելի քանակի զանգեր է ստացել. «Անկեղծ եմ ասում, ես անգամ չեմ հասկանում, թե ինչպես են իմ հեռախոսահամարը գտնում, բայց ինձ անասելի քանակի զանգեր են գալիս, բողոքում ու պահանջում, որ հետ վերադառնանք: Այդ ժամանակ հասկանում եմ, որ միայն նրա համար, որ տեսնեինք, թե ինչքան սպասված ու սիրված ենք, ոչինչ, արժեր նեղություն կրել և մի պահ հեռանալ: Նման վերաբերմունքը ինձ իսկապես շատ է հուզել՝ արտասվելու չափ: Մեզ միշտ համոզել են, որ մեր հաղորդումը վարկանիշ չունի, որ պետք է ժամանակի կանոններով առաջ շարժվել, վերափոխվել, որ պարտադիր չէ միայն մեզ համար ցանկալի երաժշտությունը հնչի եթերում, մեզ միշտ համոզում էին, որ մեզ ոչ մեկ չի դիտում, բայց այս ընթացքում ես հասկացա, որ իրականում այդ ամենը սուտ էր, հեռուստադիտողը գիտի, թե ինչ է ուզում»,- պատմեց նա:

Շարունակությունը՝ այստեղ։