Ավետիսյանների հարազատները Գյումրու հրապարակում հայտարարեցին դատական նիստին մասնակցելու որոշման մասին

Գյումրիում սպանված Ավետիսյանների հարազատները կմասնակցեն հունվարի 18-ին ռուսական 102-րդ ռազմաբազայում յոթ հոգանոց ընտանիքի անդամների սպանության մեջ մեղադրվող Վալերի Պերմյակովի գործով դատական արտագնա նիստին: Նրանք Գյումրիի կենտրոնական հրապարակում հունվարի 16-ին հավաքվել էին` հայտարարելու իրենց որոշման և պահանջների մասին: Ավետիսյանների իրավահաջորդների շահերի պաշտպաններն ընդգծեցին, որ առանց հարազատների ներկայության էլ միևնույն է, նիստերն ընթանալու են և դրանց չմասնակցելն ու միջնորդություններով հանդես չգալը չի բխում Ավետիսյանների հարազատների շահերից: «Արմենպրես»-ի հաղորդմամբ` Ավետիսյանների ընտանիքի դուստր Լուսինե Ավետիսյանը, առաջին անգամ խոսելով լրատվամիջոցների համար, նշեց. «Դժվար է Պերմյակովի հետ միևնույն դահլիճում գտնվելը, սակայն մենք կմասնակցենք դատական նիստին, որպեսզի այն չընթանա առանց մեր ներկայության և առանց մեր մասնակցության չկայացվեն վճիռները»:

Այդուհանդերձ, փաստաբանները մտադիր են դատական նիստին ներկայացնել միջնորդություն` դատը արտագնա չանցկացնելու և նիստերը Շիրակի մարզի առաջին ատյանի ընդհանուր իրավասության դատարանում անցկացնելու մասին: Ավետիսյանների հարազատները պահանջում են նաև նորմալ պայմաններ ռուսական բազայի տարածքում անցկացվող դատական նիստի ժամանակ. նախորդ անգամ նրանց շահերի պաշտպանների համար սեղան տեղադրված չէր: Նստելու տեղերը բավարար չէին:

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին  մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Ռուսական կողմում հարուցված քրեական գործով Պերմյակովը դասալքության եւ զենքի ապօրինի կրման համար օգոստոսի 12-ին դատապարտվել է 10 տարվա ազատազրկման: Հայկական կողմի վարույթում գտնվող գործով դատական առաջին նիստը կայացել է 2015թ. դեկտեմբերի 18-ին: