ԵՄ-ի տնտեսությունն այս տարի կշարունակի համեստ տեմպերով վերականգնվել

Մարինա Ներսեսյանը ֆեյսբուքյան իր էջում գրում է .

Moody's միջազգային վրականիշային գործակալությունը (Moody's Investor Service) և ամերիկյան հայտնի PNC ֆինանսական ծառայությունների խումբը (PNC Financial Group) 2016թ. ակնկալում են Եվրամիության տնտեսության վերականգնում և կայուն զարգացում:

Վերլուծաբանների մտավախությունը կայանում էր հիմնականում նրանում, որ եվրագոտու տնտեսության վերականգնումը կարող է դանդաղել կամ դադարել Փարիզում տեղի ունեցած ահաբեկչական հարձակումների, ինչպես նաև արտարժույթի իրարանցման հետևանքով: Սակայն, Եվրոպական Հանձնաժողովի կողմից հրապարակած զեկույցը փաստում է, որ ահաբեկչությունը մեծ ազդեցություն չի ունեցել տնտեսական առաջընթացի վրա, քանի որ 2016թ. արդյունաբերողներն ու գործարարները զարգացման նոր հեռանկարներ ունեն:
Համաշխարհային բանկի կողմից հրապարակված «Գլոբալ տնտեսական հեռանկարներ» զեկույցում նշվում է, որ պահանջարկի ամրապնդման ու արտահանման խթանման շնորհիվ 2015 թ.-ին եվրագոտում որոշ չափով աճ գրանցվեց:

2015թ Եվրոպական Միության կողմից հրապարակված՝ «Չնայած մարտահրավերներին, չափավոր վերականգնում» խորագրով զեկույցում նշվում է, որ հեշտ վարկային պայմանները, իրական եկամուտն ու բարձր ներդրումները կօգնեն դիմակայել 2016-2017 թթ. մարտահրավերներին: 
Մի շարք երկրներում կառուցվածքային բարեփոխումները դրական ազդեցություն են գործում հետագա առաջընթացի վրա: Օրինակ, hամեմատաբար կայուն տնտեսական իրավիճակ է տիրում Իսպանիայում, Գերմանիայի իրավիճակը մի փոքր հիասթափեցնող է, իսկ ինչ վերաբերում է Իտալիային և Ֆրանսիային, ապա այստեղ տնտեսությունն աստիճանաբար վերականգնվում է:

Ֆինանսների և էկոնոմիկայի եվրոպական հանձնակատար Պիեռ Մոսկովիսիի կարծիքով, 2016թ. ԵՄ տնտեսությանը սպասվում է «տնտեսական աճի, գործազրկության և բյուջեի դեֆիցիտի նվազում», որը սակայն անհավասար կընթանա անդամ պետություններում: Նա նաև հավելել է, որ համաշխարհային տնտեսության հեռանկարները կմնան անորոշ՝ կոչ անելով ԵՄ երկրներին ջանք գործադրել տնտեսությունները բարեփոխելու ուղղությամբ:

Նման պայմաններում, Եվրոպայի Կենտրոնական բանկը հատուկ դրամավարկային քաղաքականություն է մշակել, համաձայն որի՝ պետք է վերադառնալ միջնաժամկետ գների մոտ 2% կայունության:
Միջազգային մամուլի հեղինակավոր պարբերականների կանխատեսման համաձայն՝ 2016թ. ԵՄ-ի տնտեսական աճը կհասնի մոտ 1,7%-ի, սակայն դեռևս մտահոգություններ կան պոտենցիալ աճի նվազման, գործազրկության բարձր մակարդակի և պետական մեծ պարտքերի վերաբերյալ:

Այսպիսով, ԵՄ տնտեսությունն այս տարի կշարունակի համեստ տեմպերով վերականգնվել: