Ասք՝ Մարինե Մարաբյանի մասին.ՀՀ ԱԺ պատգամավոր-ուրվականը

Լուսինե Թորոսյանը ֆեյսբուքյան իր էջում գրում է.

Ավարտվեց 2015 թվականը: Այն նոր բացահայտումների տարի էր. ԱԺ-ն գերազանցեց մեր սպասելիքները. ի տարբերություն այլ պետական մարմինների՝ նրանք ընդհանրապես արհամարհում են՝ երևալով չափազանց զբաղված և անհասանելի:
Քանի որ համարվում ենք ժողովրդավար պետություն, որը ենթադրում է ժողովրդի իշխանություն՝ ազատ ընտրությունների և հանրաքվեների միջոցով, ուստի պարտքս եմ համարում այս ամենը ամենայն մանրամասնությամբ ներկայացնել Մարինե Մարաբյանի ընտրողներին: Իսկ հետևություններն ու մեկնաբանությունները թողնում եմ ընթերցողներին: 

Այսպես Մարինե Մարաբյանին համագործակցելու առաջարկը առաջին անգամ էլեկտրոնային նամակով ուղարկվել է 2015 թվականի հուլիսի 27-ին: Պատասխան չստանալով՝ 1 ամիս անց կապ ենք հաստատել իր օգնականի հետ, կրկին նամակ ենք ուղարկել վերջինիս տրամադրած էլ-փոստով՝ առաջարկելով մասնակցել սեպտեմբերի 4-6 կազմակերպվելիք Աղվերանում կայանալիք աշնանային դպրոցին: Սեպտեմբերի 1-ին ուղարկվել է օրակարգը, համաձայն որի Մարինե Մարաբյանը ներկայացնելու էր «Կնոջ դերը խորհրդարանում» թեման: Սակայն Մարինե Մարաբյանը այդպես էլ չպատասխանեց ու չմասնակցեց մեր հանդիպմանը. այնքան զբաղված է եղել, որ օգնականը չի կարողացել նրան տեսնել և տեղեկացնել այդ ամենի մասին (երևի էլ-փոստն էլ ժամանակ չի ունեցել ստուգելու):

Սեպտեմբերի 23-ին արդեն փոստով ենք նամակ ուղարկել Մարինե Մարաբյանին, ինչպես նաև ԱԺ նախագահ պարոն Գալուստ Սահակյանին: Մարինե Մարաբյանին ուղարկել ենք պատվիրված հետադարձ ծանուցագրով նամակ, որի համաձայն ստացել ենք ծանուցագիրը՝ ՀՀ ԱԺ ընդհանուր բաժնի ստորագրությամբ: Կից ուղարկում եմ նաև ստորագրության էլեկտրոնային պատճեն: Սակայն, փաստորեն, նամակի այս տեսակն էլ չնպաստեց սպասված արդյունք ստանալուն:

ՀՀ սահամանամերձ գյուղերում տեղի ունեցած կրակոցների վերաբերյալ «Դեմոկրատիան այսօր» ՀԿ-ն համապատասխան գյուղերի երիտասարդների համար հոկտեմբերի 7-ին հանդիպում էր կազմակերպել դեսպանների կամ դեսպանատան ներկայացուցիչների հետ: Հոկտեմբերի 5-ին էլ-փոստով նամակ ենք ուղարկել Մարինե Մարաբյանին՝ հրավիրելով նրան ևս՝ որպես սահմանապահ գյուղերի պատգամավոր, մասնակցելու նշված հանդիպմանը՝ երիտասարդներից լսելու առկա իրավիճակի վերաբերյալ, ովքեր ականատես են եղել այդ իրադարձություններին: Հրավերի մասին բանավոր՝ հեռախոսով տեղեկացվել է նաև նրա օգնականին: 

Հոկտեմբերի 14-ին ուղարկվել է սեպտեմբերի 23-ին փոստով ուղարկված նամակի էլեկտրոնային տարբերակը՝ որպես հիշեցում: Այս անգամ նամակներն ուղարկվել են արդեն ոչ միայն Մարինե Մարաբյանին և պարոն Գալուստ Սահակյանին, այլև Տավուշի մարզպետարան, Միքայել Վարդանյանին, Հասմիկ Ազիբեկյանին:
Այսպիսիով 2015 թվականին Տավուշի մարզի երիտասարդների համար Մարինե Մարաբյանի հետ հանդիպում կազմակերպելու բոլոր ջանքերն ապարդյուն են անցել: Կից ներկայացված են ուղարկված նամակները: 

Հուսով ենք, որ 2016 թվականին Տավուշի մարզի «պատգամավորը» հավուր պատշաճի կիրականացնի իր լիազորությունները, այն է՝ հանդիպումներ կկազմակերպի Տավուշի մարզի բոլոր գյուղերի բնակիչների հետ՝ կողմնակալ վերաբերմունք դրսևորելով և համաչափ մոտեցում ցուցաբերելով ՝ նրանց խնդիրներին ծանոթանալու նպատակով և դրանք լուծելու պատրաստակամությամբ, որն էլ կնպաստի մարզի երիտասարդների ներուժի զարգացմանը լիարժեք ծավալով, կապահովի մարզի բնակիչների ընդհանուր բարեկեցությունը և կկանխի արտագնա աշխատանքը:

Ելնելով ՀՀ ԱԺ պատգամավոր-ուրվականի աշխատելաոճից՝ մարզի պատգամավորի հավանական արժանի թեկնածու կարող է լինել հենց այդ մարզի բնակիչը, ով իրոք մարզի շահերի մասին կմտածի ու կնստի աթոռին իսկապես աշխատելու և օգուտ տալու մտադրությամբ: