Մեղրի անվան ստուգաբանությունը շատ հետաքրքիր է

Սիրակ Օհանյանը ֆեյսբուքյան իր էջում գրում է.

Շատ անգամներ են ինձ հարցրել Մեղրի անվան ստուգաբանության հետ կապված ու երբ վերջին անգամ այցելեցի Մեղրի այնտեղ հանդիպեցի նշանավոր աշխարհագետ Կամսար Ավետիսյանին: Ու նրանից էլ փորձեցի ճշտել Մեղրի անվան ստուգաբանությունը:

Վարկածների այդպիսի առատությունը և կարծիքների բազմազանությունը դժվարացնում են Մեղրի անվան ծագման և ստուգաբանության խնդրում անաչառ դիրքորոշում ունենալու: Հատկապես այն պատճառով, որ մոտեցումներից յուրաքանչյուն էլ իր մեջ պարունակում է տրամաբանությանը մոտ և ճշմարտությանը հավակնող տեսակետ:
Մեղրի անվան ստուգաբանությունը շատ հետաքրքիր է, որը բավականին առանձնահատուկ է՝ կապված վարկածների առատության հետ:

* Ըստ պրոֆեսոր Թ. Հակոբյանի տվյալների Հայկական լեռնաշխարհում, մինչև հայ ժողովրդի կազմավորումը, բնակվել են բազմաթիվ ցեղեր, որոնցից 8-10-ը՝ Սյունիքում:

Դրանք էին՝ սյունիները, սակերը, բաղեր ցեղերը, ծավդեացիները, լաբիճները, քաշերը, արևները: Այդ ցեղերն ու խմբերն ընդգրկվելով հայ ժողովրդի կազմավորման գործընթացի մեջ հետագայում դադարեցին գոյություն ունենալուց, թողնելով այն աշխարհագրական անուններ, որտեղ նրանք բնակվում էին: Պատահական չէ, որ տեղանունների զգալի մասը Սյունյաց աշխարհում ունեն էթնիկական ծագում: Հավանաբար այդպես է առաջացել Արևիք անվանումը (Մեղրին հնում կոչվել է Արևիք):

* Ըստ «Աշխարհացույցի» պատմական Արևիք գավառը համարվել է Սյունիքի 12 գավառներից մեկը. Արևիք անունը հնագույն ծագում ունի, որը պետք է կապել «արևոտ տեղ» անվան հետ:

* Ըստ Ղևոնդ Ալիշանի, որը պնդում է, թե Արևիքը նախկինում կազմել է Գողթի մի մասը, իսկ հետագայում անջատվել նրանից և միացել Սյունյաց ածխարհին, Մեղրին իր անվանում ստացել է հնում այնտեղ ստացվող անուշահամ մեղրի պատճառով:

* Տեսակետներից մեկի համաձայն Մեղրին իր անվանումտ ստացել է պարսկերեն Միհր (արև) բառի հնչյունափոխությունից, որը նախկին՝ «Արևիք» անվան թարգմանությունն է: 

* Նշանավոր աշխարհագետ Կամսար Ավետիսյանը անվան առաջացումը կապում էր Մեղրիի քաղցրահամ թզից ծորացող մեղրի հոտ:

* Հայտնի է նաև այն տեսակետը, ըստ որի Արշակ Երկրորդ թագավորը անցել է Մեղրիով, խմել տեղի գինին, որը բավականին քաղցր է եղել, և հիացմունքից բացականչել. «Գինու չէ նման,. այլ մեղրի»: Ենթադրում են, որ դրա համար էլ վայրը կոչվել է Մեղրի:

* Ասում են նաև, թե իբր Մեղրին այդպես է կոչվել հնում այնտեղ իշխանություն հաստատած պարսից արքայադուստր Մեհրիի անունից: