Ադրբեջանի 2016 թվականի պետբյուջեում 1,3 մլրդ մանաթ լրացուցիչ պակասորդ է ստեղծվել

Ադրբեջանի Ժողովրդական ճակատ կուսակցության վարչական խորհրդի անդամ, տնտեսագետ Նեմաթ Ալիեւը հայտարարել է, որ այդ երկրի 2016 թվականի պետբյուջեում արդեն այժմվանից 1,3 մլրդ դոլար լրացուցիչ պակասորդ է ստեղծվել:

Ինչպես հաղորդում է «Արմենպրես»-ը, «Ազադլըգ»-ը գրում է, որ այս մասին տնտեսագետը գրել է Facebook-ի իր էջում` նշելով, որ ադրբեջանական կառավարության կողմից մանաթի արժեզրկման հաշվին բյուջեն լցնելու ծրագիրը հերթական խնդիրների ճանապարհ է բացել:

«Հարցը նրանում է, որ ազգային արժույթի խիստ արժեզրկմանը զուգահեռ ներքին շուկայում 50 տոկոսից ավելի թանկացում է ստեղծվել: Պարեն, դեղամիջոց եւ այլ ապրանքներ գնելու համար բյուջեով նախատեսված գումարները հաշվարկվել են նախկին գներով: Իսկ թանկացումների պատճառով, այդ բնագավառների համար այժմ անհրաժեշտ է հատկացնել 600 մլն մանաթով ավելի գումար: Բացի այդ, աճել է նաեւ դիվանագիտական ծառայության մարմինների, հյուպատոսությունների եւ այլ միջազգային գործունեության համար ֆինանսավորման ծախսերը:  1 դոլարը 1,05 մանաթ փոխարժեքի համար հաշվարկներ կատարած կառավարությունն այդ նպատակների համար նախատեսել էր 1,1 մլրդ մանաթ միջոց: Այժմ մեկ դոլար հավասար է 1,7 մանաթի, եւ որպեսզի նախատեսված ոլորտներն իրագործվեն, անհրաժեշտ է լրացուցիչ 1,3 մլրդ մանաթ հատկացնել: Նկատի ունենալով, որ մանաթի փոխարժեքը գնալով ընկնելու է, ապրանքների գներն էլ աճելու են, այդ լրացուցիչ ֆինանսական միջոցաի ծավալը եւս աճելու է: Այսօր նավթի շուկայական գնի կտրուկ էժանացումն ավելի է ծանրացնում առկա վիճակը», -նշել է Նեմաթ Ալիեւը:

Թերթը գրում է, որ լուրջ կորուստներ է ունեցել նաեւ Ադրբեջանի պետական նավթային հիմնադրամը, քանի որ ակտիվների ներդրումների ուղղություններում ինվեստիցիաների արժեքի էժանացում է տեղի ունեցել: Հիմնադրամից ստացված տեղեկություններով` 2015 թվականի հունվար-նոյեմբեր ամիսների ընթացքում հիմնադրամի ակտիվները 9,5 տոկոսով կամ 3,5 մլրդ դոլարով նվազել են:

«Ազադլըգ»-ը գրում է նաեւ, որ 2015 թվականի ընթացքում 1,5 մլրդ դոլարով պակասել է նաեւ Ադրբեջանի պետական նավթային ընկերության` SOCAR-ի կողմից պետբյուջե կատարվող ներարկումները, ինչի մասին ասվում է ընկերության պաշտոնական կայքում: