Ադրբեջանում փակվում են զբոսաշրջային ընկերությունները

Ադրբեջանի տուրիստական ընկերությունների գործունեության մեջ լիակատար լճացում է. զբոսաշրջային ընկերություններն իրար հետեւից փակվում են: Պատճառը կայանում է մանաթի արժեզրկման մեջ, քանի որ արտասահման շրջագայությունների գները հաշվարկվում են դոլարով եւ եվրոյով:

Այս մասին, ինչպես հաղորդում է«Արմենպրես»-ը, minval.az կայքին հայտնել է Fly Travel ընկերության սեփականատեր Մամեդ Ալիեւը:

Նրա խոսքով` դոլարի փոխարժեքի խիստ բարձր լինելու պատճառով շբոսաշրջային փաթեթների վաճառքն անհնարին է դարձել:

«Դոլարի բարձր փոխարժեքի պատճառով փաթեթների գները խիստ թանկացել են: Բանկչության մեծ մասը դրանք չի կարող ձեռք բերել: Գները հաշվարկվում են դոլարով, երբ այն փոխում ենք մանաթի, շատ թանկանում են», -ասել է Մամեդ Ալիեւը:

Նրա խոսքով` ձմռանը մարդիկ մեկնում էին հիմնականում Թուրքիա եւ Արաբական միացյալ էմիրաթներ, սակայն, այժմ այդ փաթեթները եւս չեն վաճառվում:

«Մանաթի արժեզրկումն այնքան ուժեղ է, որ մարդիկ ստիպված են այժմ մտածել ամենաանհրաժեշտ կարիքների մասին: Ճամփորդություններն անցել են հետին պլան: Իսկ նրանք, ովքեր փոքր ինչ փող ունեն, չեն ցանկանում ծասխել դրանք, այլ պահում են սեւ օրվա համար», -ասել է նա:

Մամեդ Ալիեւը հայտնել է, որ եթե տեղի հյուրանոցներն անգամ իջեցնեն գները, ապա միեւյնույն է, դրանց նկատմամբ պահանջարկ չկա:

Minval.az-ին հայտնի է դարձել, որ մանաթի վերջին արժեզրկումից հետո (պաշտոնապես մեկ դոլարը հավասար է 1,07 մանաթի) մի շարք խոշոր տուրիստական ընկերություններ, օրինակ` Ulduz Travel, Etna Travel եւ SB Travel, արդեն փակվել են:

Նավթի համաշխարհային գների եւ մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. փակվել են նավթաարդյունաբերության մի շարք ձեռնարկություններ, պետական եւ մասնավոր հաստատություներ, հազարավոր աշխատավորներ գործազուրկ են դարձել, Ադրբեջանի տնտեսական աճն օրեցօր նվազում է, միջազգային վարկանիշային գործակալությունների համաձայն` Ադրբեջանական բանկերը կանգնած են ռիսկի սահմանին:

Ադրբեջանի բյուջեն դեֆիցիտային է դարձել: Եկող տարվա բյուջեն անցյալ տարվա պետբյուջեից մոտ 2 անգամ փոքր է սահմանվել. երկու անգամ կրճատվել է նաեւ Ադրբեջանի 2016 թվականի ռազմական բյուջեն` սահմանվելով մոտ 1,7 մլրդ դոլար: Ադրբեջանի 2016 թվականի պետբյուջեի ծախսային մասը 3,1 մլրդ մանաթով կամ 15 տոկոսով կրճատվել է:

Ադրբեջանի 2016 պետբյուջեի դեֆիցիտը կազմում է 1 մլրդ 698 մլն մանաթ, կամ ՀՆԱ-ի 2,9 տոկոսը:

Բյուջետային ցուցանիշները կազմվել են մեկ բարելի դիմաց նավթի գինը 50 դոլարի չափով եւ մեկ դոլարի դիմաց մանաթի 1,05 փոխարժեքի կանխատեսմամբ:

Ադրբեջանի պետբյուջեն եւ պաշտպանական ոլորտի համար հատկացումները, անցյալ տարվա եղածի համեմատ, երկու անգամ նվազել են, ինչը կապված է նավթի գների շարունակական անկման հետ:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: 

Ադրբեջանի 2016 թվականի պետբյուջեում նավթի գինը մեկ բարելի համար նախատեսված է 50 դոլար: Ներկայում այն արդեն պետբյուջեում նախատեսվածից մոտ 18 դոլարով ցածր է: