Ադրբեջանը կճանաչի ԼՂ անունով որևէ միավորում, եթե այն ստեղծվի այլ պետության տարածքում. Ալիև

Ադրբեջանի նախագահը Իլհամ Ալիևը հայտարարել է, թե «Բաքուն ԼՂ խնդիրը ռազմա-քաղաքական ճանապարհով կարգավորել է, պատերազմն անցյալում է մնացել»: Այս մասին հայտնում է «ՌԻԱ-Նովոստին»:

Ալիևի կարծիքով՝ Ադրբեջանը «վերականգնել է իր տարածքային ամբողջականությունը», ու եթե ինչ-որ մեկն ուզում է «վերակենդանացնել Լեռնային Ղարաբաղ անունը կրող մեռելին, թող դա անի իր տարածքում՝ ստեղծի ինչ-որ միավորում, հանրույթ, պետություն, որ կկրի «Լեռնային Ղարաբաղ» անունը»:

Այս դեպքում, ըստ Ալիևի, «Ադրբեջանն այն կճանաչի, բայց ոչ Ադրբեջանում»:

Նրա խոսքով ՝ Ադրբեջանը հակամարտությունը կարգավորեց ռազմաքաղաքական միջոցներով, պատերազմը մնաց ետևում, ԼՂՀ հակամարտությունը նույնպես մնաց պատմության մեջ:

Հիշեցնենք, որ 2020 թվականի սեպտեմբերի 27-ին ադրբեջանական կողմը մարտական գործողություններ է սանձազերծել Լեռնային Ղարաբաղում և օկուպացրել է դրա մեծ մասը, այդ թվում՝ Շուշի քաղաքը։

Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին սեպտեմբերի 27-ից սկսած ռազմական գործողությունների դադարեցման վերաբերյալ։

Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։

Ավելին՝ այստեղ