Ավետիսյանների հարազատները չեն ցանկանում մասանակցել դատական նիստին ռուսական բազայում

Գյումրիում  2015 թվականի հունվարի 12-ին  սպանված Ավետիսյանների հարազատները չեն մասանակցի  ռուս զինծառայող Վալերի Պերյակովի գործով դատական նիստին, եթե այն կրկին տեղի ունենա ռուսական ռազմաբազայի տարածքում: Այս մասին հունվարի 12-ին Ավետիսյանների տան մոտ հայտարարեցին հարազատները՝ նշելով, որ իրենք միայն կմասնակցեն դատավարությանը,  եթե ՀՀ դատական մարմինները այն իրականացնեն Հայաստանի դատարաններից մեկում, ավելին՝ հարազատները պահանջում են նաև նիստին ՀՀ գլխավոր դատախազի ներկայությունը: «Եթե որևէ բան չփոխվի մենք դատին չենք մասնակցի, մենք ռուսական ռազմաբազա չենք գնա: Ինչու գնանք այնտեղ, եթե գործը հանձնված է հայկական կողմին և Հայաստանն էլ ունի դատական համակարգ»,-նշեց Հասմիկ Ավետիսյանի քույրը՝ Մարիամ Հովհաննիսյանը:

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել:

 Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Պերմյակովն ընդունել է առաջադրված մեղադրանքը: Գործով դատական նիստը 2015 դեկտեմբերի 18-ին հետաձգվեց մինչև 2016 հունվարի 18-ը: Միջնորդությունը ներկայացրել էր հանրային պաշտպաններից մեկը` Էդուարդ Աղաջանյանը: Դատարանը բավարարեց նրա միջնորդությունը և նրան մեկ ամիս ժամանակ տվեց նյութերին ծանոթանալու համար: Պերմյակովը դատական առաջին նիստի ժամանակ ուներ հանրային երկու պաշտպան: Մյուս պաշտպանը` Արմեն Պողոսյանը&l aquo; դեկտեմբերի 30-ից հետո այլևս չի ներկայացնի Պերմյակովի շահերը:

Արմենուհի Մխոյան