Կութում հակառակորդի կրակոցների հետևանքով ավերվածություններ և տուժածներ չկան․ համայնքի ղեկավար

Գեղարքունիքի մարզի Կութ համայնքում այսօր խաղաղ է եղել, կրակոցներ չեն հնչել։ Այս մասին NEWS.am-ի հետ զրույցում հայտնեց Կութ համայնքի ղեկավար Սիմա Չիտչյանը։

«Երեկ փամփուշտները կպան տան տանիքներին ու այդպես այդ ձայններից իմացանք հերթական կրակոցների մասին։ Կրակոցների հետևանքով գյուղում ավերվածություններ չկան, Դրսում գյուղից բնակիչներ կային, բայց իրենք չեն թիրախավորվել»,- նշեց նա։

Համայնքի ղեկավարի խոսքով՝ կրակոցները դադարել են գիշերը՝ ժամը տասից հետո։

«Պատերազմից հետո պարզ է՝ մարդկանց մեջ անհանգստություն ու վախ կա, բայց գյուղը լքող մարդիկ չեն եղել, ու նման մտադրություն ունեցող մարդիկ էլ չկան»,- ընդգծեց Սիմա Չիտչյանը։

Հարցին, թե ինտենսիվ կրակահերթերի կամ ավելի լուրջ իրավիճակների դեպքում ինչ պետք է անեն գյուղացիները, Չիտչյանը պատասխանեց․ «Գյուղի յուրաքանչյուր բնակիչ գիտի՝ նման դեպքում ինչ պետք է անի»։

Հիշեցնենք, որ նախօրեին՝ օգոստոսի 16-ին, ադրբեջանական Զինված ուժերի ստորաբաժանումները սադրանքի են դիմել հայ-ադրբեջանական սահմանի Երասխի ուղղությամբ։ Դրա արդյունքում հրազենային մահացու վիրավորում է ստացել 1975 թվականին ծնված ավագ ենթասպա Վահան Դիմիկի Թաթոսյանը։

Իսկ ավելի ուշ՝ ժամը 18։10–ի սահմաններում, արդեն Գեղարքունիքի հատվածում Ադրբեջանը տարբեր տրամաչափի հրաձգային զինատեսակներից կրակ է բացել հայկական դիրքերի ուղղությամբ, ինչի արդյունքում մահացու հրազենային վիրավորում է ստացել ժամկետային զինծառայող, 19–ամյա Արման Հովհաննեսի Հակոբյանը:  Հայկական կողմի ձեռնարկած պատասխան գործողությունների արդյունքում հակառակորդն ունի առնվազն երեք զոհ եւ վիրավոր:

Ժամը 21.00–ի սահմաններում էլ Մարդու իրավունքների պաշտպան Արման Թաթոյանը հայտնել է, որ ադրբեջանական զինված ուժերն ուղիղ նշանառությամբ կրակում են Գեղարքունիքի մարզի Կութ եւ Նորաբակ գյուղերի վրա եւ բնակիչները փորձում են պատսպարվել: