ՌԴ-ն պատրաստ է աջակցել ՀՀ Զինված ուժերի արդիականացմանն ու բարեփոխմանը
Ուշադրության կենտրոնումՌուսական ռազմական գերատեսչությունը պատրաստ է աջակցել հայկական զինված ուժերի արդիականացմանն ու բարեփոխմանը: ТАСС-ի փոխանցմամբ՝ այս մասին հայտարարել է ՌԴ պաշտպանության նախարար Սերգեյ Շոյգուն:
«Մենք կարևորում ենք մեր համագործակցության զարգացումը ռազմական ոլորտում՝ ինչպես երկկողմ ձևաչափով, այնպես էլ ՀԱՊԿ շրջանակներում: Ընդ որում, մենք պատրաստ ենք շարունակել աջակցել Հայաստանի Զինված ուժերի բարեփոխումների ծրագրի իրականացմանը»,- Մոսկվայում ողջունելով ՀՀ պաշտպանության նախարար Արշակ Կարապետյանին՝ ասել է Շոյգուն:
Նա նշել է, որ հանրապետության տարածքում է գտնվում 102-րդ ռուսական ռազմակայանը, որը լավ հագեցած է և անվտանգության երաշխավոր է հանդիսանում: «Հայաստանը Ռուսաստանի դաշնակիցն ու առանցքային գործընկերն է Անդրկովկասում անվտանգության ապահովման գործում, և մենք չափազանց շահագրգռված ենք այս տարածաշրջանում կայունության պահպանմամբ»,- հավելել է ՌԴ պաշտպանության նախարարը:
Շոյգուն շնորհավորել է Կարապետյանին այդ պաշտոնում նշանակվելու կապակցությամբ՝ նշելով, որ այն տեղի է ունեցել «դժվար ժամանակաշրջանում, երբ երկրի պաշտպանական ոլորտը բարեփոխելու դժվարին խնդիրներ կան»:
Կարապետյանն իր հերթին երախտագիտություն է հայտնել Շոյգուին՝ Հայաստանի Զինված ուժերի մարտունակության վերականգնմանը, զորքերի հագեցմանն և պատրաստմանն օգնելու պատրաստակամության համար և ընդգծել, որ «Ռուսաստանը միակ պետությունն է, որը հայ ժողովրդի համար անվտանգության իսկապես շոշափելի արտադրանք է տալիս և այսօր զբաղվում է անվտանգության հարցերով ոչ միայն Լեռնային Ղարաբաղում, այլև՝ անմիջականորեն Հայաստանի սահմաններին,- ասել է Կարապետյանը:
«Մենք պատրաստ ենք շատ սերտ և արդյունավետ համագործակցության»,- հավելել է ՀՀ պաշտպանության նախարարը:
1
2
3
4
5
1
2
3
5
4
