Զսպվածության կոչ ՔՊ-ականների հարազատներին

Հասարակության մեջ կան դեմ և կողմ կարծիքներ քաղաքական գործիչների ընտանիքի անդամների, հարազատների և մտերիմների կողմից կատարվող մեկնաբանությունների նկատմամբ։ Ճիշտ է, նրանք էլ ունեն իրավունք արտահայտելու կարծիք կամ տեսակետ, քանի որ հասարակության մի մասն են, բայց շատ ավելի բարոյական և ընդունելի կլինի, եթե նրանց մեկնաբանությունները լինեն ավելի զուսպ, կշռադատված և օբեկտիվ։

Առհասարակ, քաղաքական գործիչների ընտանիքի անդամները պետք է զերծ մնան քաղաքական գնահատականներ հնչեցնելուց և սոցիալական ցանցերում այս կամ այն անձին պիտակավորելուց, որովհետև պետական պաշտոնյայի, իշխանավորների հարազատները իրադարձություններին օբեկտիվ գնահատական չեն տալիս, այլ արտահայտում են միայն սեփական տեսակետը։ Իսկ այդ տեսակետը բխում է սեփական շահերից։

Հատկապես բարոյական չէ, երբ այս ամենի մասին գնահատական են տալիս սոդոմ-գոմոր ստեղծողների հարազատները։ Գուցե գայթակղիչ է ինքնահաստատվել սոցիալական ցանցում, բայց ահավոր զզվելի և անպարկեշտ է, երբ սոցիալական ցանցերում անընդհատ տեսնում ես պաշտոնյաների և նրանց ընտանիքի անդամների գրառումներն ու երջանիկ նկարները, երբ հատկապես երջանկության որևէ առիթ չկա։ Շատ ավելի ընդունելի կլիներ, եթե, օրինակ, Ալեն Սիմոնյանի մայրը, ով վերջերս շատ ակտիվ քննադատում է ՔՊ-ի հակառակորդներին, օրինակ, վարչապետի ընտանիքի անդամները, որոնք պարբերաբար երջանիկ դեմքով նկարներ են հրապարակում, ավելի զուսպ լինեին սոցիալական ցանցերում, երբ երկիրը, ժողովրդական լեզվով ասած, չի լողում մեղր ու կարագի մեջ, և այդ ամենի համար պատասխանատու են միայն իշխանությունները։

Հասարակության մի ստվար զանգված ապրում է սահմանափակ հնարավորություններով՝ ծայրահեղ աղքատության մեջ, պատերազմի վտանգը դեռևս չափազանց իրական է և վերցնել և ուղղակի գովել ՔՊ-ին՝ չտեսնելով շատ ակնհայտ սխալներն ու բացթողումները, առնվազն հիմարություն է, եթե չասեմ՝ ծաղր սեփական ժողովրդի նկատմամբ։

Աննա Սիմոնյան