«Գյումրու բժշկական կենտրոն»-ում սահմանվել է խստացված հսկողություն

«Գյումրու բժշկական կենտրոն»-ում 2015 թվականի դեկտեմբերի 31-ից առ այսօր սահմանվել է խստացված հսկողություն:

Ինչպես տեղեկացրեց կենտրոնի մամուլիպատասխանատու Նարեկ Կիրակոսյանը, ՀՀ առողջապահության նախարար Արմեն Մուրադյանի հրամանով բոլոր բաժանմունքներում  իրականացվում է խստացված հերթապահություն: «Տոնական օրերին, «Գյումրու բժշկական կենտրոն»-ում  գործադիր տնօրեն Արմեն Իսահակայանի գլխավորությամբ ստեղծվել է հիվանդությունների իրավիճակը վերահսկող հատուկ աշխատանքային խումբը« որի շրջանակներում բաժանմունքի վարիչների եւ բժիշկների մասնակցությամբ իրականացվում են խորհրդատվություններ« հաշվետվություն եւ տվյալների ամփոփում: Բժշկական կենտրոնի այս օրերի աշխատանքների վերաբերյալ պարբերաբար տեղեկատվություն է տրամադրվում նաեւ Շիրակի մարզպետ Ֆելիքս Ցոլակյանին»,-նշեց Նարեկ Կիրակոսյանը:

 Ինչպես հայտնում են կենտրոնից՝ 2016 թվականի հունվարի 1-7-ը բժշկական կենտրոն դիմել է 396 քաղաքացի, որոնց բուժումն իրականացվել է, ըստ անհրաժեշտության, ստացիոնար եւ ամբուլատոր։ Հունվարի 3-ին գրանցվել է ծակող-կտրող գործիքով վնասված երկու քաղաքացիների ԲԿ ընդունման մեկ դեպք։ Տուժածների մոտ ախտորոշվել են կրծքավանդակի, աջ եւ ձախ բազուկների վերին հատվածի կտրող-ծակող վերքեր։ Հիվանդները դեռ շարունակում են ստացիոնար բուժում ստանալ «Գյումրի» բժշկական կենտրոնի վիրաբուժական բաժանմունքում,գտնվում են հիվանդասենյակում։ Հունվարի մեկից յոթը ԲԿ ընդունվել են նաեւ ՃՏՊ-ի հետեւանքով դիմած քաղաքացիներ, որոնց ցուցաբերվել է համապատասխան բուժօգնություն։ Ներկայում ԲԿ-ի վնասվածքաբանական բաժանմունքում բուժում է ստանում մեկ քաղաքացի։ Այդ օրերին եղել են նաեւ սրտաբանական, թերապիայի, հեմոդիալիզի եւ վերակենդանացման բաժանմունքի հիվանդներ։

Հաշվի առնելով գրիպի եւ սուր շնչառական վիրուսների դեպքերը՝ «Գյումրու բժշկական կետրոն»-ում սահմանափակվել են հիվանդների մոտ այցելող քաղաքացիների հոսքը եւ տեսակցության ժամերը: