Շիրակի մարզում ուժեղ կարկուտը վնասել է ցանքատարածքների 80 տոկոսը. գյուղացիները փոխհատուցման հույս չունեն
Ուշադրության կենտրոնումԵրեկ Շիրակի մարզում տեղացած ուժեղ կարկուտը մեծ վնասներ է հասցրել մարզի 4 համայնքների ցանքատարածություններին: Այս մասին NEWS.am-ի հետ զրույցում ասաց Մարմաշեն խոշորացված համայնքի ղեկավար Կարեն Արշակյանը` հավելելով, որ կարկուտը վնասել է Ջաջուռ, Մեծ Սարիար, Լեռնու եւ Շիրակ գյուղերի ցանքատարածքների եւ մշակաբույսերի դաշտերին:
Համայնքապետը նշեց, որ չնայած հակակարկտային կայանները կրակել են, սակայն չի հաջողվել ցրել կարկտաբեր ամպը:
«Կարկուտը 80 տոկոսով վնասել է հացահայտիկը, ու մնացած մշակաբույսերը, նույնիսկ էլ քաղելու չի: Մենք հանձնաժողով ենք կազմել, որ գնահատենք վնասների չափերը եւ ներկայացնենք: Գիտե՞ք հետաքրքիրը որն է, որ մենք կգնահատենք, օերերով կաշխատենք այդ ամեն ինչի վրա, կներկայացնենք վնասների չափերը ու ընդհանրապես ոչ մի պատասխան: Էլ ինչի՞ համար կաշխատենք, այդ աշխատանքը շաբաթներ կտեւի, ու վերջում կստանանք պատասխան, որ հատուցում չկա»,- ասաց նա:
Մեր հարցին, թե մարզպետարանն է նման հարցերով զբաղվում եւ վնասների չափերը ներկայացնում Կառավարություն, համայնքապետն ասաց, որ ինքը վերջին անգամ մարզպետին տեսել է իր ներկայացման օրը:
«Համայնքի ինքնակառավարման մարմինները եւ գյուղացիները միայնակ են մնացել իրենց պրոբլեմների հետ»,- ասաց նա` նշելով, որ հույս էլ չունեն օգնության կամ փոխհատուցման:
1
2
3
4
5
1
2
3
5
4
