Գլխին պետք է հարգանքով վերաբերվել. Չինական փիլիսոփայություն կյանքի մասին

1. Մի մոռացիր անկեղծորեն ժպտալ ու սիրտդ սիրով լցնել: Այն հիանալի միջոց է ընդդեմ բոլոր հիվանդությունների: 

Երբ դու տխուր ես, բարկացած, ճնշված ու լաց ես լինում կամ նյարդայնանում, քո օրգանիզմը սկսում է թույներ արտադրել: Իսկ երբ ուրախ ես ու երջանիկ` լինում է հակառակ պատկերը` օրգանիզմում սկսում է բուժիչ հեղուկ արտադրվել: Գաղտնիք չէ, որ այսօր մենք ապրում ենք անհանգիստ կյանքով: Շատերն իրենց աշխատանքային օրն ավարտում են գլխացավով, ու դա համարվում է սովորական երեւույթ: Այն տագնապը, որ զարգանում է և մեր ներսում, և մեր շուրջը, անհապաղ պետք է վերացնել: Անհրաժեշտ է միայն սովորել, որ երբ բարդ իրավիճակ է ստեղծվում, ինչ էլ լինի, թույլ չտանք, որ այն մեզ կլանի: Դրա համար պետք է շատ ժպտալ: Այս պարզ ժեստի շնորհիվ աշխարհն, ասես, փոխվում է, և այն, ինչ սպառնում էր վերածվել անախորժության` անհետանում է: Սկզբում հավանաբար դժվար կլինի գնահատել ներքին ժպիտի հետեւանքները, բայց ժամանակի ընթացքում այն կդառնա քո կյանքի անբաժանելի մասնիկը: Որտեղ էլ լինես, ժպտա, թուլացիր, սիրով լցվիր: Դա շատ օգտակար է: Այս դեպքում անհաջողությունները կհալչեն՝ ինչպես սառույցը ջերմ արեւից:

2. Քիչ անհանգստացիր և շատ գործիր:

Քիչ մտածիր ապագայի և անցյալի մասին, քանի որ հենց դրանք են ծնում անհանգստության պատճառներ, իսկ փոքրիկ անհանգստությունն անգամ սթրեսի պատճառ կարող է դառնալ: Դրա փոխարեն փորձիր կենտրոնանալ` զարգացնելով քո մեջ օգնելու և ներելու ունակությունները:

3. Պետք է զարգացնել մտքի ուժը:

Արևելյան լեզուներից շատերում, ինչպես և չինարենում, միտք և սիրտ հասկացություններն արտահայտվում են նույն բառով: Երբ մարդը հասնում է այն մակարդակին, որ այլևս ինքն իր վրա սեւեռված չէ ու կարողանում է մոռանալ իր անձի մասին, ստանում է հիվանդություններից ազատվելու միջոցներ: 

4. Կառավարիր սեռական հակումներդ և թույլ մի տուր, որ դրանք կառավարեն քեզ:

Առհասարակ կյանքում ամեն ինչ պետք է չափավոր լինի, այս դեպքում` նաև սեռական կյանքը: Սեռական մեծ ակտիվությունը կտրուկ նվազեցնում է մարդու կենսական էներգիայի պաշարը և վատթարացնում կենտրոնանալու ունակությունը: Սեռական ցանկությունն առաջանում է զգայարանների միջոցով ու գրգռում միտքը: Անհրաժեշտ է կառավարել զգացմունքներն ու ցանկությունները:

5. Պետք է լավ պահել գլուխն ու տաք պահել ոտքերը:

Գլխին պետք է հարգանքով վերաբերվել: Այն Աստծո և մտքի տաճար է, որը կառավարում է բոլոր օրգաններին: Գոյություն ունի մի կանոն. «Գլուխը զով պահիր, իսկ ոտքերը` տաք»: Այս ձևով կխուսափենք գլխում շատ էներգիայի կուտակումից, ինչը կարող է վատ զգացողության կամ հիվանդության պատճառ հանդիսանալ: Երբ չափազանց շատ է էներգիա գնում դեպի գլուխը, կարող է բարձրանալ արյան ճնշումը: Մինչդեռ այդ էներգիան տեղափոխելով ոտնաթաթերը` կկարողանանք իջեցնել արյան ճնշումը, իսկ հետևելով, որ ոտքերը տաք լինեն, կկանխենք սրտի նոպաները: 

6. Շատ կարևոր է նաև պարանոցը տաք պահել:

Պարանոցով են անցնում բազմաթիվ անոթներ ու նյարդեր, որոնք գնում են դեպի գլուխը: Պետք չէ չափազանց լարված նայել կամ լսել: Զգայական օրգանների ակտիվ ու լարված աշխատանքը կարող է տարբեր հիվանդությունների պատճառ դառնալ: Կյանքը երկարացնելու և հիվանդություններից խուսափելու համար չինական բժշկությունը խորհուրդ է տալիս օրվա ընթացքում հաճախակի կատարել թուքը կուլ տալու վարժությունը: 

7. Սնվելու փիլիսոփայությունը 

Պետք չէ այնքան ուտել, որ հարկադրված լինեք պառկել կամ նստել, դա կրճատում է մարդու կյանքը: Սեղանից պետք է վեր կենալ կիսակուշտ վիճակում ու չմոռանալ զբոսանքի մասին: Քնելուց առաջ երբեք չի կարելի ուտել: Կարելի է ուտել քիչ, բայց հաճախակի: Այս դեպքում մարսողությունն ավելի հեշտ տեղի կունենա: Սկզբում պետք է ուտել տաք ճաշատեսակները, ապա գոլ, իսկ ուտելուց առաջ միշտ հարկավոր է խորը շունչ քաշել ու մի քիչ օդ կուլ տալ: Առավելապես կծու ճաշատեսակները պետք է ուտել գարնանը, թթուն` ամռանը, դառը` աշնանը, իսկ սակավ աղին` ձմռանը: Եթե ամեն դեպքում չարաշահել եք ուտելը, չի կարելի շատ ջուր խմել, իսկ խմելիս էլ պետք չէ արագ կուլ տալ: Սովորաբար դժվարամարսությունն առաջանում է, երբ երկար քաղցած մնալուց հետո միանգամից ուտում են հագեցվածության աստիճանի: Չի կարելի դատարկ ստամոքսին հում մրգեր ուտել, իսկ հում բանջարեղենն էլ փչացնում է մաշկի գույնը: 

8. Պահպանել չափը:

Չափազանց երկար քայլելը վնաս է հոդերին, շատ երկար նստելը վնասում է մկաններին, չափազանց երկար կքանստելը` ոսկորներին, չափազանց երկար պառկելը` կենսական էներգիային, երկար դիտելը` արյանը: Զայրույթը, տխրությունը եւ մելանխոլիան վնասակար են, ինչպես մեծ ուրախությունն ու զվարճանքը: Վնասակար է տառապելն ու սեռական պահանջները երկար զսպելը: Մի խոսքով, վնասակար է այն, ինչը չափի մեջ չէ:

Նյութը հրապարակման պատրաստեց Սուսաննա Ազատյանը

Աղբյուրը <a href="http://168.am/2015/12/28/579490.html">© 168.am</a></br>