Նախարարությունը չի հերքում պատերազմի զոհերի ԴՆԹ նույնականացման սարքի գնման հաշվին ստացված գերշահույթի փաստը

Առողջապահության նախարարությունը, որը լրատվամիջոցների գրավոր և բանավոր հարցերին պատասխանում է բացառապես աշխատանքային օրերին, կիրակի օրը շտապել է պարզաբանում  տարածել NEWS.am լրատվական գործակալության՝ «Պատերազմի զոհերի ԴՆԹ նույնականացման սարքի գնման հաշվին գերշահու՞յթ են ստացել. նոր փաստեր՝ կասկածելի գործարքից» վերտառությամբ հոդվածի առնչությամբ։  Նախարարությունից պաշտոնապես նշում են, որ նյութում տեղ գտած տեղեկատվությունը խեղաթյուրված է, հոդվածն, ըստ էության որակելով որպես զրպարտություն։ Զավեշտալին այն է, որ նախարարությունը 70 տողանոց պարզաբանման մեջ գրեթե նույնությամբ շարադրել է գնումների պաշտոնական կայքից NEWS.am–ի վերցրած տվյալներն ու թվարկել այն սարքավորումները, որոնց մասին նյութում հիշատակված են, սակայն որևէ կերպ չի հերքել մեր ուսումնասիրության արդյունքում պարզ դարձած այն փաստը, որ մատակարար ընկերությունը գնման գործընթացի արդյունքում առնվազն 111  մլն դրամի (212,237 ԱՄՆ դոլար) շահույթ (վերադիր) է ստացել։

«Տեղեկացնենք, որ ՀՀ ԱՆ «Դատաբժշկական գիտագործնական կենտրոն» ՊՈԱԿ-ում առկա են «ThermoFisher Scientific» ամերիկյան ընկերության, «Մեդիսար» ՍՊ և «Պրոմ-Տեստ» ՍՊ ընկերությունների կողմից տրամադրված գնային առաջակները, որոնց չեն համապատասխանում հոդվածում նշված թվերը»,–ասված է նախարարության պատասխանում։ Նկատենք, որ gnumner.am կայքում ևս առկա են այդ տվյալները, որոնք բաց են և հասանելի հանրության համար և այս առնչությամբ ևս նախարարությունը նոր հեծանիվ չի հայտնագործել։ Ավելին, մենք մանրամասն ուսումնասիրել ենք մրցույթին մասնակցող մատակարարների գնային առաջարկները և արձանագրել, որ պայմանագրում նշված սարքավորումների, ձեռքբերված ապրանքների իրական գնի և այս ապրանքների մաքսազերծված արժեքների միջև առկա է խոշոր տարբերություն։

ԱՆ–ի պարզաբանումը թույլ է տալիս ենթադրելու, որ ավելի քան համոզիչ են NEWS.am–ի այն կասկածները, որ պետական պաշտոնյաները ևս ներգրավված են եղել այս գործընթացում, ինչու չէ նաև ստացել իրենց մասնաբաժինը։ Ասվածի վկայությունն է այն, որ նախարարությունն, առանց պարզելու տվյալ սարքավորումների մաքսազերծման արժեքները և հոդվածում տեղ գտած այլ համոզիչ փաստարկներ,  շտապել է  արդարացնել մատակարարին, ինչպես նաև այն պաշտոնյային, որի օրոք նախարարության ՊՈԱԿ–ն իրականացրել է այդ գնումը։ Հավանաբար հենց այդ պաշտոնյան էլ երեկ երեկոյան խառնել է առողջապահության ողջ համակարգը, հանձնարարելով գործող նախարարին մինչև առավոտ արձագանքել պատերազմի զոհերի մարմինների և մասունքների ԴՆԹ նույնականացման փորձաքննություններին առնչվող հրապարակմանը, այդ կերպ փորձելով գոնե իր վրայից մաքրել խայտառակ գործարքի ողջ պատասխանատվությունը։ Այսպիսով՝ ՀՀ պետական վերահսկողական ծառայության և ՀՀ գլխավոր դատախազության ուշադրությունն ենք հրավիրում NEWS.am–ի հրապարակման և դրան հաջորդած պարզաբանման վրա։ Այս կառույցները պետք է պարզեն, թե որքանով են արդյունավետ ծախսվել պետական միջոցները, արդյոք պաշտոնատար անձինք որևէ առնչություն ունեն գործարքից ստացված շահույթի հետ, արդյոք գործ ունենք վատնման ենթադրյալ դեպքի հետ, թե՞ ոչ։