Ռուսաստանի բնակիչների գրեթե 75 տոկոսը տարվա քաղաքական գործիչ է համարում Պուտինին

Ռուսաստանցիների գրեթե երեք քառորդը ՌԴ նախագահ Վլադիմիր Պուտինին համարում է տարվա քաղաքական գործիչ, երկրորդ տեղում արտաքին գործերի նախարար Սերգեյ Լավրովն է: Այս տվյալները ներկայացրել է Հասարակական կարծիքի ուսումնասիրման համառուսաստանյան կենտրոնի (ՀԿՈւՀԿ) գլխավոր տնօրեն Վալերի Ֆյոդորովը, տեղեկացնում է ՏԱՍՍ-ը:

«Տարվա քաղաքական գործիչը ռուսաստանցիների համար մնում է Վլադիմիր Պուտինը, նրա անունը նշել է հարցման մասնակիցների 74 տոկոսը: Նրան մեծ տարբերությամբ հաջորդում են Սերգեյ Լավրովը (13 տոկոս), Դմիտրի Մեդվեդևը (5 տոկոս), Սերգեյ Շոյգուն (5 տոկոս), Վլադիմիր Ժիրինովսկին (4 տոկոս)»,- ասել է նա լրագրողներին:

Ֆյոդորովը հայտնել է, որ մարզիկների վարկանիշում առաջին անգամ առաջատարը դարձել է բիաթլոնիստ Անտոն Շիպուլինը (6 տոկոս), երկրորդ տեղում գեղասահորդ Եվգենի Պլյուշչենկոն է (4 տոկոս), երրորդում՝ մարմնամարզուհի Ելենա Իսինբաևան (3 տոկոս):

«Տարվա դերասանի վարկանիշում առավել հաճախ նշել են Սերգեյ Բեզռուկովին (5 տոկոս) և Կոնստանտին Խաբենսկուն (5 տոկոս), Դմիտրի Նագիևին (3 տոկոս)»,- տեղեկացրել է ՀԿՈՒՀԿ-ի ղեկավարը:

Երաժիշտների վարկանիշում ավանդաբար առաջին հորիզոնականներում են Ֆիլիպ Կիրկորովը (6 տոկոս) և Ստաս Միխայլովը (5 տոկոս), իսկ երրորդը, ըստ հարցման տվյալների, առաջին անգամ դարձել է Դմիտրի Խվորոստովսկին (5 տոկոս):

Համառուսաստանյան հարցումը ՀԿՈւՀԿ-ն անցկացրել է 2015 թվականի դեկտեմբերի 19-20-ին: Հարցմանը 1600 մարդ է մասնակցել Ռուսաստանի 46 մարզերի, երկրամասերի և հանրապետությունների 130 բնակավայրերում: Վիճակագրական սխալանքը չի գերազանցում 3,5 տոկոսը: