Փաշինյանի գործիքը․ Հայաստանի վարչապետը որոշել է իրեն ենթարկել ռազմական վերնախավը

Nsn.fm-ը գրում է, որ Երևանի Կովկասի ինստիտուտի տնօրեն, քաղաքագետ Ալեքսանդր Իսկանդարյանը Radiotochka NSN հեռագրային ալիքին տված հարցազրույցում համոզմունք է հայտնել, որ ոչ պոպուլյար վարչապետի կողմից «իր» մարդու նշանակումը Գլխավոր շտաբում երկրի ռազմական ղեկավարության վրա ազդելու փորձ է:

Հիշեցնենք, որ վարչապետ Նիկոլ Փաշինյանը իր նախկին խորհրդական Արշակ Կարապետյանին նշանակել է Գլխավոր շտաբի պետի նոր տեղակալ, որպեսզի վերահսկի նախկինում իրեն անհավատարիմ այդ կառույցը: «Փաշինյանը փորձում է ուժեղացնել իր ազդեցությունը Հայաստանի զինված ուժերում: Երկրորդ ղարաբաղյան պատերազմի ավարտից հետո ձևավորվել է հատուկ վերաբերմունք գործադիր իշխանության նկատմամբ: Հիմա բանակում փոփոխություններ են տեղի ունեցել. Դա բնական է: Պաշտպանության նախարարը և Գլխավոր շտաբի պետը փոխվել են: Ակնհայտ է, որ կլինեն նաև այլ փոփոխություններ: Պետք չէ մոռանալ, որ գրեթե բոլոր բարձրաստիճան գեներալները ստորագրել են վարչապետի պաշտոնանկության մասին հայտարարությունը: Հակամարտությունը կարգավորվել է, բայց ոչ ոք չի մոռացել դրա մասին: Պարոն Փաշինյանը փորձում է ինչ-որ կերպ ազդել բանակի բարձրագույն ղեկավարության վրա: Այս նշանակման նպատակն է բարձրացնել քաղաքական վերնախավի ազդեցությունը ռազմական ղեկավարության վրա», - պնդում է քաղաքագետը:

Ինչպես հայտնի է, մինչ 2016 թվականը Կարապետյանը զբաղեցրել է Գլխավոր շտաբի հետախուզության վարչության պետի պաշտոնը, սակայն աշխատանքից ազատվել է Ապրիլյան պատերազմի հետևանքով: Հայաստանի նախագահ Արմեն Սարգսյանը չի համաձայնվել նրա Գլխավոր շտաբ վերադառնալու հետ, բայց նաև չի խանգարել դրան: Իսկանդարյանի խոսքով դա բացատրվում է նախագահի թույլ ազդեցությամբ: «Հիմա նախագահի՝ որպես քաղաքական ինստիտուտ և վարչապետի միջև հարաբերությունները բավականաչափ վատ են: Հայաստանում նախագահը ներկայացուցչական գործիչ է և նա լիազորություններ չունի», - բացատրել է փորձագետը:


Անի Սիմոնյան

Pressmedia.am