Սերժ Սարգսյանը քաղաքական լրջագույն պարտիա է սկսել

Հայաստանի երրորդ նախագահ, ՀՀԿ նախագահ Սերժ Սարգսյանը, շախմատային լեզվով ասած, քաղաքական լրջագույն պարտիա է սկսել, որի մասին վաղ թե ուշ հանրության ավելի լայն զանգվածներ կտեսնեն և կլսեն:

Ինտելեկտուալ այդ խաղի սիրահար Սարգսյանը առաջիկա քաղաքական զարգացումներին՝ մասնավորապես ընտրական գործընթացներին, պատրաստվում է ամենայն լրջությամբ: Դրա մասին դժվար չէ գլխի ընկնել նրա և ՀՀԿ-ականների քաղաքական ուղերձներից: Չնայած այն հանգամանքին, որ Հանրապետականը հայտարարել է, թե չի մասնակցի ընտրություններին, եթե դրանք կազմակերպվեն երկիրը կործանման տանող կապիտուլյանտ վարչապետի կողմից, այդուհանդերձ նաև ակնհայտ է, որ Հանրապետականն, ըստ էության, պատրաստ է մասնակցել դրանց ցանկացած ժամանակ: Նկատի ունեմ այն, որ Հանրապետականը չմասնակցելու մասին խոսում է ոչ այն պատճառով, որ քաղաքական և կազմակերպչական առումով պատրաստ չէ դրանց:

Հակառակը, ՀՀԿ-ն, հանդիսանում է Հայաստանի ամենաինստիտուցիոնալացված և բյուրեղացած քաղաքական միավորը, որը ընտրական ցանկացած գործընթացի համար ունի անհրաժեշտ բավարար ռեսուրսներ: Դա փաստ է: Հետևաբար ի՞նչ են ուզում Հանրապետականները:

Նախ, ըստ իրենց, քաղաքական անհեռատեսություն և արկածախնդրություն է կապիտուլյանտի հետ և նրա կողմից կազմակերպվող ցանկացած քաղաքական գործընթացի մասնակցել: Մեծ հաշվով դա այդպես է, քանի որ պատերազմում պարտված և երկիրը անդունդը գլորող վարչապետը նախ ի՞նչ գործ ունի երկրի ղեկավարի աթոռին, ավելին՝ մի հատ էլ ընտրություններ է կազմակերպում: Քաղաքական բարոյականության տեսանկյունից դա նոնսենս է:

Հաջորդը՝ Նիկոլ Փաշինյանն իր իշխանությունը վերարտադրելու համար ընդունակ է ամեն ինչի, հետևաբար հետընտրական ցնցումներ անպայմանորեն կլինեն: Իսկ Հայաստանը այլևս չունի ներքին ռեսուրսներ այս անգամ քաղաքացիական բախումներին և քաղաքական հերթական ճգնաժամի ալիքին դիմագրավելու համար: Իսկ որ դրանք կլինեն, կասկած չկա, քանի որ Նիկոլը կամ կեղծելու է ընտրությունները, կամ պարտվելուց հետո իր կողմնակիցներին հանելու է փողոց՝ բախումներ հրահրելու համար:

Սերժ Սարգսյանն, ըստ էության, այս մտավախություններն ունի, այդ իսկ պատճառով դեռևս հապաղում է առաջացած թնջուկը քաղաքական այլ գորիքակազմով լուծելու համար: Ով ով, բայց Սերժ Սարգսյանը շատ լավ է պատկերացնում հետընտրական զարգացումների վտանգավորությունը Հայաստանի և Արցախի համար, հետևաբար դրանցից խուսափելու համար այլ ճանապարհային քարտեզ է, ըստ երևույթին, նախապատրաստում:

Բացի այդ, եթե այդուհանդերձ առանց ՀՀԿ մասնակցության, ընտրություններ տեղի ունենան, ապա մի կարևոր հանգամանք ևս ի հայտ կգա՝ ընտրված պառլամենտը կունենա լեգիտիմության մեծ դեֆիցիտ թե երկրի ներսում, թե դրսում, միջազգային կազմակերպությունների հետ հարաբերություններում:

Ինչևէ, Սերժ Սարգսյանը զգուշավորությամբ սպասման մեջ է պահում թե՛ ընդդիմադիր, թե՛ իշխանական բևեռներին՝ հասկացնել տալով, որ «ջուրը չտեսած՝ մի բոբիկացեք», քանզի չկա երաշխիք, որ՝ նախ արտահերթ ընտրություններ անցկացնելու գաղափարից Նիկոլը հերթական անգամ չի հրաժարվի, և երկրորդ, եթե այդուհանդերձ դրանք տեղի ունենան, ապա դրանց պետք է մասնակցել տրամաբանորեն այլ ձևաչափով ու գործիքներով՝ Նիկոլի իշխանության վերարտադրությունը ոչ մի պարագայում թույլ չտալու համար: Հակառակ դեպքում մի քանի մանդատի համար կռիվ տալն անիմաստ է, քանի որ սեղանին է դրված Հայաստանի պետականության լինել-չլինելու հարցը: