Եթե Քոչարյանն ու Պուտինը ընկերական հարաբերությունների մեջ են` դա չի նշանակում Պուտինը ցանկանում է Քոչարյանին տեսնել Հայաստանի ղեկավարի պաշտոնում

Ռոբերտ Քոչարյանը հարցազրույց է տվել Վլադիմիր Պոզներին, որում սուր քննադատության է արժանացրել ՀՀ իշխանություններին, նաև խոսել է վերջին 3 տարիների ընթացքում ՀՀ բանակի մարտունակության քայքայման մասին: Այս թեմայով pressmedia.am կայքը  զրուցել է քաղաքագետ Ալեքսանդր Մանասյանի հետ։

— Պարոն Մանասյան, ինչպե՞ս եք գնահատում հարցազրույցը, և ինչո՞ւ էր պետք նախընտրական այս փուլում նման հարցազրույցը: 

— Քոչարյանը պատասխանել է Պոզների տված հարցերին, և ես այդտեղ որևէ տարօրինակ բան չեմ տեսնում։ Քոչարյանի  տված գնահատականները տարբերվում են իշխանության գնահատականներից, ինչը սպասելի էր, և որևէ տարօրինակ բան տեղի չի ունեցել։ Արցախյան 44-օրյա պատերազմը տարբեր մարդկանց կողմից տարբեր կերպ է մեկնաբանվում, ոմանք նույնիսկ կարծում են, որ մենք հաղթել ենք, բայց փաստ է, որ մենք ունեցել ենք անդառնալի կորուստներ և  այդ փաստից ելնելով պետք է բոլոր գնահատականները հնչեն:  Ես այդպես եմ կարծում։

— Այս ընտրություններին Ռուսաստանն ինչպիսի՞ դերակատարություն կունենա՝ հաշվի առնելով, որ միշտ ունեցել է միջամտություն ՀՀ ներքին գործերին, այդ թվում՝ ընտրական գործընթացներին:

— Եթե անկեղծ ասեմ՝ դա նման է այն հարցին, որ մինչ այս հնչել է, այն է, թե Պուտինը մինչ այս ընտրել է մեր նախկին ղեկավարներին։ Այստեղ ես կարծում եմ, որ բոլորովին այլ խնդիր է, որի մասին չի բարձրաձայնվում։ Դա այն է, որ այստեղ կա երկու կողմնորոշում, և Քոչարյանը բաց տեքստով ցույց է տալիս, որ ինքը գտնում է, որ Ռուսաստանը մեր անվտանգության երաշխավորն է, իսկ «Իմ քայլը» կամ այդ  մասին չի խոսում, կամ ամենևին էլ դեմ չեն, որ ռուսական զորախումբ հայտնվի Սյունիքում, որովհետև Սյունիքի անվտանգության երաշխիքը այդ զորագնդի մեջ են տեսնում։ Բայց, միևնույն ժամանակ, տանում են Ռուսաստանի կողմից բացահայտ կամ ոչ բացահայտ քաղաքական գիծ։ Ժամանակին ՀՀ  առաջին նախագահը ընտրել է իր կողմնորոշումը և չի հրաժարվել, որ Ռուսաստանը Գյումրիում ունենա լուրջ հենակետ, որպես Հայաստանի անվտանգության բաղադրիչ։ Նրանից հետո եկած նախագահները, ըստ էության, այդ կարծիքն են կիսել և, եթե հիմա նորերն էլ ուզում են նոր զորագունդ ստեղծել Սյունիքում՝ նշանակում է, որ իրենք էլ պաշտպանվածության հարցում ունեն ռուսական կողմնորոշում։ Հիմա ես չեմ կարող ասել, թե Պուտինը ինչպես է խառնվում։ Եթե  Քոչարյանն ու Պուտինը  ընկերական հարաբերությունների մեջ են՝ դա ամենևին չի խոսում այն մասին, որ Պուտինը ցանկանում է Քոչարյանին տեսնել Հայաստանի ղեկավարի պաշտոնում։ Պուտինն ու Փաշինյանը  միասին են ստորագրել նոյեմբերի 9-ի հանաձայնագիրը և  գուցե  նաև  Պուտինը ցանկանա, որ Նիկոլ Փաշինյանը մնա  վարչապետ, քանի որ միասին են կնքել այդ փաստաթուղթը։  

— Քոչարյանը հայտարարում է, որ ընտրություններին մի քանի ուժերի  դաշինք է գլխավորելու: Դա իր շանսերը չի՞ մեծացնում:

— Եթե այդպիսի քայլ է կատարում՝ նշանակում է, որ կարծում է, որ իր շանսերը կմեծանա, բայց կարող է և այդպես չլինել։ Բայց, եթե ինքն է դա ձեռնարկում՝ նշանակում է, որ ինքը կարծում է, որ այդ դեպքում իր շանսերը կմեծանան։ 

Անի Սիմոնյան

Pressmedia.am