Հասարակության բացարձակ մեծամասնությունը հույս չի կապում ոչ այս իշխանությունների, ոչ էլ Ռոբերտ Քոչարյանի հետ

Արդեն պարզ է, որ  Ընտրական օրենսգիրքը փոփոխվում է, որով վերացվում է ռեյտինգային ընտրակարգը, ներդրվում է փակ համամասնական ցուցակներով ընտրակարգը։ Այս թեմայով pressmedia.am  կայքը զրուցել է քաղաքագետ Արմեն Բաղդասարյանի հետ։

— Պարոն Բաղդասարյան, ինչպե՞ս է գնահատում փակ ցուցակներով համամասնական ընտրությունների գնալու որոշումը` հաշվի առնելով, որ հնչում են տեսակետներ, որ դա կտանի միակուսակցական համակարգի ձևավորման:

— Ես կարծում եմ, որ դա բացարձակապես կապ չունի միակուսակցական համակարգի ձևավորման հետ։ Կոնկրետ այդ փոփոխությունը դրական եմ գնահատում, թեև այն ամբողջ փոփոխությունների փաթեթը, որ հասարակությունը ակնկալում էր ունենալ, դրանով չի լուծվում, որովհետև այնտեղ փոփոխություններ են պետք նաև կուսակցությունների մասին օրենքում, խոսքը նաև ներկուսակցական ժողովրդավարության մասին է, բայց, ամեն դեպքում, դա իհարկե, առաջընթաց է և միակուսակցական համակարգի հետ կապ չունի, որովհետև  այսպես, թե այնպես ընտրողները պետք է կատարեն կուսակցությունների, նրանց ծրագրերի միջև, ոչ թե անձերի։ Այսինքն, սա  նպաստում է, որ  մրցակցությունը ընթանա  գաղափարախոսությունների ծրագրերի միջև  և այդ առումով  այս փոփոխությունը դրական եմ գնահատում։  

— Ի՞նչ կտա պարզ համամասնական ընտրակարգով ընտրությունների գնալը:

— Պարզ համամասնական ընտրակարգով ընտրությունների գնալը  կբերի  նրան, որ այդ տեղական իշխանիկների,  հեղինակությունների ինստիտուտը կվերանա, այսինքն  մարդիկ ձայն կտան կուսակցություններին և ոչ թե  մարդկանց, ոչ թե ինչ-որ մեկին, հաշվի առնելով նրանց հեղինակությունը, ունեցվածքը և այլն։ Մենք հասկանում ենք, թե ժամանակին ինչու է ներդրվել այդ համակարգը Սերժ Սարգսյանի կողմից, նպատակը պարզապես այն էր, որ  եթե որևէ մեկը ցանկանում է կոնկրետ տարածքից դառնալ պատգամավոր, ապա  ընտրական համակարգն այնպիսին էր, որ նա,  եթե գումարներ է ծախսում, ինչ-որ քարոզարշավ է անում, ապա այդ ձայները գնան նաև կուսակցությանը, այսինքն անհատը փող ծախսի նաև կուսակցության համար։ Իմաստը դա էր, հիմա այդ անհատների գաղափարը  ընդհանրապես վերանում է, այսինքն դառնում է մաքուր կուսակցական ընտրություն։

— Ինչպիսի՞ ընտրապայքար եք կանխատեսում, երբ արդեն կան իրականացված սոցիոլոգիական հարցումներ, իսկ  մյուս կողմից էլ ակնհայտ է, որ ընդդիմադիր քաղաքական ուժերը, կարծես թե, դաշինքներով չեն պատաստվում մասնակցել ընտրություններին:

—  Ես չեմ կարող ասել, թե ինչպիսի ընտրապայքար կլինի, որովհետև հայտնի չէ, թե որ ուժերն են մասնակցելու, բայց, եթե հիմնական քաղաքական ուժերը լինեն գործող իշխանությունները և Ռոբերտ Քոչարյանը, ապա ես կանխատեսում եմ շատ լարված, բայց քաղաքական իմաստով բացարձակ անորակ ընտրություններ, որովհետև  իմ պատկերացմամբ հասարակության բացարձակ մեծամասնությունը հույս չի կապում ոչ այս իշխանությունների հետ, ոչ էլ Ռոբերտ Քոչարյանի հետ։ Այսինքն եթե հիմնականում այդ երկու բևեռները լինեն` ենթադրում եմ, որ կլինեն շատ լարված, շատ կոշտ, ագրեսիվ հռետորաբանությամբ, բայց քաղաքական առումով բովանդակազուրկ  ընտրություններ։

Աննա Սիմոնյան

Pressmedia.am