Կույրերի միավորման կազմակերպությունների վճարած ԱԱՀ-ն փոխհատուցելու է կառավարությունը

ՀՀ կառավարությունը կփոխհատուցի Հայաստանի կույրերի միավորման անդամ հանդիսացող' աշխատողների միջին ցուցակային թվաքանակի առնվազն 50% հաշմանդամ ունեցող, ընկերությունների 2015 թվականի ինը ամիսների ընթացքում վճարված ԱԱՀ-ն ամբողջությամբ:

ՀՀ աշխատանքի և սոցիալական հարցերի նախարար Արտեմ Ասատրյանը նշեց, որ ելնելով այն իրողությունից, որ համաձայն «Եկամտային հարկի մասին» ՀՀ նոր օրենքի, սկսած 2013 թվականի հունվարի 1-ից, պարտադիր սոցիալական ապահովության վճարները ներառվել են աշխատողների պաշտոնային դրույքաչափերի մեջ, ուստի առաջարկվում է 2015 թվականին ՀՀ պետական բյուջեից փոխհատուցել նաև Միավորման կազմակերպությունների կողմից 2015 թվականի ինն ամիսների ընթացքում վճարված եկամտահարկի 61.19 տոկոսը, որն ըստ միավորման կողմից ներկայացված հաշվարկի կազմում է 15 մլն 503 հազար դրամ:

Նախագծի նպատակն է խթանել Միավորման անդամ հանդիսացող' աշխատողների միջին ցուցակային թվաքանակի առնվազն 50% հաշմանդամ ունեցող ընկերությունների տնտեսական գործունեությանը, նրանցում աշխատող հաշմանդամների սոցիալական խնդիրները լուծելու և հասարակությանն ինտեգրելու նպատակով' պետական բյուջեից ֆինանսական փոխհատուցումներ տրամադրելու միջոցով:

Որոշման նախագծի ընդունման արդյունքում ակնկալվում է Միավորման անդամ հանդիսացող ընկերություններում աշխատող հաշմանդամների սոցիալական պաշտպանվածության ապահովումը: